सासष्टी, मच्छीमारी हंगाम १ ऑगस्टपासून सुरू होत आहे. आज बाणावलीत मच्छीमारांनी समुद्रकिनारी ख्रिस्ती धर्मगुरूंच्या उपस्थितीत बोटी, जाळी, इतर साधने व समुद्राची पूजा करून देवाचे आशीर्वाद घेतले.

सर्व मच्छीमारांचे रक्षण करावे, भरपूर मासळी त्यांच्या जाळ्यात पडावी व सर्व गोमंतकीय मासळी खाऊन संतुष्ट व्हावेत. तसेच मच्छीमारांसह सर्वांनाच चांगले आयुष्य, आरोग्य व यश प्राप्त व्हावे, अशी देवाकडे प्रार्थना केल्याचे धर्मगुरूंनी सांगितले.

मच्छीमार पेले फर्नांडिस यांनी सांगितले की आम्ही पारंपरिक मच्छीमार दरवर्षी समुद्रात मासळी गोळा करण्यापूर्वी देवाचे आशीर्वाद घेतो. त्याप्रमाणे आज आम्ही देवाचे आशीर्वाद घेतले. नवा हंगाम आम्हा सर्वांना यशदायी ठरो, अशी आम्ही प्रार्थना केली. त्यानंतर जाळी बोटीला बांधून बोट समुद्रात सोडण्यात आली. आज केवळ सुरवात म्हणून थोडी मासळी गोळा केली जाईल.