मडगाव : सोनसोड्यावरील आगीवर अग्निशमन दलाने नियंत्रण मिळविले असले तरी अधूनमधून ही आग घुमसतच आहे. आग अधिक भडकू नये यासाठी कचऱ्याच्या ढिगाऱ्यावर माती घालण्यास सुरूवात केली आहे. आतापर्यंत सुमारे 40 ट्रक माती कचऱ्यावर (Garbage) टाकण्यात आली असून, ज्या भागात आग लागली होती ती दुसऱ्या बाजूने पसरू नये यासाठी पोकलीन वापरून चर खोदण्यात आला आहे.

मडगाव (Margao) अग्निशमन दलाचे अधिकारी गिल डिसोझा यांनी दिलेल्या माहितीनुसार, आज सकाळीही परत आग धुमसू लागल्याने दोन गाड्या वापरून कचऱ्यावर पाणी मारून ती विझविली. काल ही आग आटोक्यात आणण्यासाठी सुमारे 80 हजार लिटर पाण्याचा वापर करण्यात आला होता. तरीही रात्री आग परत धुमसल्याने पुन्हा बंब या कचरा यार्डावर आणावे लागले होते.

दरम्यान, या आगीत पालिकेचेही (Municipality) मोठे नुकसान झाल्याची माहिती पुढे आली आहे. प्लास्टिक कचऱ्याचे बेलिंग करणारी दोन यंत्रे जाळून खाक झाली. त्याशिवाय या ठिकाणी ठेवलेल्या कचरापेट्याही आगीच्या भक्ष्यस्थानी पडल्‍या आहेत.