कळंगुट: गुमालवाडा -हणजुण येथील एका पंचतारांकित हॉटेलचे सांडपाणी खुलेआम रस्त्याशेजारच्या नाल्यात सोडले जात असल्याच्या तक्रारीमुळे मंगळवारी दुपारी हणजुण-कायसुव पंचायतीचे सरपंच लक्ष्मीदास चिमुलकर यांनी येथील हॉटेलची पाहणी करण्यात आली. यावेळी हॉटेल व्यवस्थापन दोषी आढळल्याने त्यांना दहा हजारांचा दंड ठोठावण्यात आल्याची माहिती सरपंच चिमुलकर यांनी प्रसार माध्यमांना दिली.

हणजुण-कायसुवचे पंच सुरेंद्र गोवेकर तसेच तक्रारदार अँन्थोनी डिसोझा व ग्रामस्थ मोठ्या संख्येने उपस्थित होते. संबंधित हॉटेल कॉन्टिनेन्टच्या व्यवस्थापनाकडून गेले कित्येक दिवस तेथील सांडपाणी खुलेआम रस्त्याच्या नाल्यात सोडले जात असल्याची रीतसर तक्रार ॲँथोनी डिसोझा व ग्रामस्थांकडून स्थानिक हणजुण -कायसुव पंचायत, शिवोली आरोग्य केंद्र तसेच हणजुण पोलिसांत दाखल करण्यात आली होती.

तक्रारीची दखल घेत हणजुणचे सरपंच लक्ष्मीदास चिमुलकर यांच्या नेतृत्वाखाली पंच सदस्य सुरेंद्र गोवेकर तसेच ग्रामस्थांनी येथील परिसराची पाहाणी केली. परिस्थितीचे गांभीर्य लक्षात घेत सरपंच लक्ष्मीदास चिमुलकर तसेच पंचायत सचिवांकडून हॉटेल व्यवस्थापनास तात्काळ दहा हजारांचा दंड ठोठावण्याबरोबरच तेथील नाला साफ करून देण्याची अट घालण्यात आली.