Nuvem गेल्या कित्येक दिवसांपासून नुवे येथील राष्ट्रीय हमरस्त्याच्या मध्यभागी उभारण्यात आलेला मोबाईल टॉवर हटविण्यासंदर्भात नुवे येथील नागरिकांनी आंदोलन केले होते.

यासंदर्भात जिल्हाधिकाऱ्यांच्या आंदोलक तसेच सार्वजनिक बांधकाम खाते, वाहतूक पोलिस, संबंधित कंपनीचे प्रतिनिधी यांच्यासोबत अनेक बैठका झाल्या.

अखेर जिल्हाधिकारी कचेरीतून सार्वजनिक बांधकाम खात्याला या मोबाईल टॉवरसंदर्भात योग्य तो निर्णय घेण्याचे निर्देश देण्यात आले आहेत.

मडगावच्या उपजिल्हाधिकारी शर्मिला गावकर यांनी सार्वजनिक बांधकाम खाते रस्ता विभागाला लिहिलेल्या पत्रामुळे गोरवोटी-नुवे येथील आंदोलन करणाऱ्या नागरिकांनी आनंद व समाधान व्यक्त केले आहे.

उपजिल्हाधिकाऱ्यांनी लिहिलेल्या पत्रासोबत वाहतूक पोलिसांनी जो अहवाल सादर केला आहे त्याची प्रत जोडलेली आहे.

नुवे येथील मोबाईल टॉवरला विरोध करणारे नागरिक मंगळवारी एकत्र जमले. गेल्या कित्येक दिवसांपासून नागरिकांनी जी एकजूट व संयम दाखविला त्याला अखेर यश प्राप्त झाले.

10 एप्रिलपासून सरकारने आयटी टेलिकॉम धोरणात बदल केला असून कंटेन्मेंट क्षेत्र किंवा राष्ट्रीय महामार्गाच्या मध्यभागी असे टॉवर या धोरणानुसार उभारता येणार नाहीत.

- एवर्सन वालेस, आंदोलक