फोंडा: वारखंडे-फोंडा येथील एका बेकायदा भंगार अड्ड्यावर बनावट आले-लसूण पेस्टचे डबे, फ्राईड कांदा आणि मसाल्याची पाकिटे विकण्याचा प्रकार फोंडा पालिकेने टाकलेल्या छाप्यात उघडकीस आला. या बेकायदेशीर कृत्याचा पंचनामा अन्न व औषध संचालनालयाने केला आहे.

फोंडा पालिकेने आज (मंगळवारी) पालिका क्षेत्रातील भंगार अड्यांवरील बेकायदेशीर केलेल्या कारवाईवेळी हा प्रकार समोर आला आहे. वारखंडे येथील हा बेकायदा भंगार अड्डा रशिद खान नामक इसम चालवत आहे तर सल्लाऊद्दीन अन्सारी नामक व्यक्ती तेथेच बनावट आले-लसूण पेस्ट व इतर साहित्य ठेवून त्याचा पुरवठा फास्ट फूडवाल्यांना करत असल्याचे उघड झाले आहे. दरम्यान, या बेकायदेशीर भंगार अड्डड्यावर लाकडी फळ्या व प्लायवूडची विक्रीही करण्यात येत असल्याचे स्पष्ट झाले आहे.

फोंडा पालिका क्षेत्रातील चार बेकायदा भंगार अड्डयांवर कारवाई करण्यासाठी फोंडा पालिकेने नोटीस बजावली होती. त्यातील एका भंगार अड्डेवाल्याने न्यायालयात

धाव घेतली आहे. अन्य तीन भंगार अड्डयांवर कारवाई करण्यासाठी आलेल्या पालिका कर्मचाऱ्यांच्या लक्षात हा प्रकार आला. यावेळी फोंडा नगराध्यक्ष आनंद नाईक, पालिका मुख्याधिकारी योगीराज गोसावी, पालिका अभियंता विशांत नाईक यांनी पालिका कर्मचाऱ्यांना घेऊन ही कारवाई केली. यावेळी फोंडा पोलिसही तैनात होते.

'रॉयल एंटरप्रायझेस'च्या नावाखाली व्यवहार

'रॉयल एंटरप्रायझेस' या नावाखाली हा व्यवहार करण्यात येत होता. त्यासाठी सल्लाऊद्दीन अन्सारी याने कोणतेही सरकारी परवाने घेतले नसल्याचे स्पष्ट झाले आहे. ज्या भंगार अड्डयावर हे सामान ठेवण्यात आले होते, तेथेच चूल आहे. हे साहित्य तेथेच पॅक करत होते काय? असाही सवाल करण्यात येत आहे.