पणजी: नागोवा व कळंगुट परिसरात अन्न व औषध प्रशासन (एफडीए) विभागाने मोठी धडक कारवाई केली. येथे बेकायदेशीरपणे सुरू असलेल्या तीन बिर्याणी किचनना तत्काळ बंद करण्याचे आदेश दिले आहेत.

ही कारवाई एफडीए अधिकारी रिचर्ड नोरोन्हा, राजाराम पाटील, अमित मांद्रेकर आणि नोसिन मुल्ला यांनी संयुक्तपणे केली असल्याची माहिती एफडीए संचालिका श्वेता देसाई यांनी दिली.

संबंधित तीन किचन झोपडपट्टीत विना परवाना सुरू करण्यात आले होते. त्यांच्याकडे कोणतेही अधिकृत अन्न परवाने नव्हते. या ठिकाणी स्वच्छतेच्या कोणत्याही अटी पाळल्या जात नव्हत्या. या किचनमधून किनारपट्टी भागातील अनेक किरकोळ विक्रेत्यांना बिर्याणी पुरवली जात होती. प्रशासनाने त्वरित हस्तक्षेप करून या किचनना बंद करण्याचे निर्देश दिले.

याशिवाय, कळंगुटमधील एका किरकोळ काजू विक्री केंद्रावरही कारवाई करण्यात आली. येथे सुमारे ५० किलो निकृष्ट प्रतीचा काजू विक्रीसाठी ठेवलेला होता. एफडीए अधिकाऱ्यांनी तो काजू जप्त करून संबंधित दुकानास विक्री बंद करण्याचे आदेश दिले आहेत.

बाटलीबंद पाणी युनिटवर धाड

अन्न व औषध प्रशासनाने आणखी एक कारवाई करत, एफएसएसएआय परवाना नसतानाही बाटलीबंद पाणी वितरित करणाऱ्या एका घाऊक युनिटवर धाड टाकली. हे पाणी महाराष्ट्रातील एका उत्पादकाकडून आणले जात होते. या पाण्याचे नमुने तपासणीसाठी प्रयोगशाळेत पाठवण्यात आले आहेत. या युनिटलाही त्वरित वितरण बंद करण्याचे आदेश देण्यात आले आहेत.