अमलीपदार्थ बाळगल्याप्रकरणी फातोर्डा पोलिसांनी बुधवारी रात्री केलेल्‍या एका कारवाईत फातोर्डा येथे राहणाऱ्या धीरज ऊर्फ डेव्‍हीड रॉड्रिग्स (२६) या युवकाला अटक केली. त्‍याच्‍याकडून सुमारे २.३७ लाख रुपये किमतीचा अमलीपदार्थ जप्‍त केला आहे. बुधवारी रात्री १२.३० वाजता पोलिसांनी या संशयिताला अटक केली.

फातोर्डा पोलिसांकडून मिळालेल्‍या माहितीप्रमाणे, हा युवक सिटी कॅफेजवळ राहात होता आणि मडगावात तो ड्रग्‍स विक्रीचे काम करत होता. पोलिस मागचे तीन दिवस त्‍याच्‍यावर पाळत ठेवून होते. बुधवारी रात्री त्‍याच्‍यावर ही कारवाई करण्‍यात आली.

या युवकाच्‍या घराची झडती घेतली असता सुमारे ८५ हजारांचा गांजा, २९ हजार रुपयांच्‍या ॲक्‍टसी गोळ्‍या, दोन हजार रुपयांचे मेटामेफटाईम, १७ हजार रुपयांचे हॅश ऑईल, १५ हजारांच्‍या हॅश स्‍टीक्‍स, ३० हजारांचे काेकेन, सुमारे ५ हजारांचा चरस तर १० हजार रुपयांचे एलएसडी पेपर्स सापडले. या अमलीपदार्थांची एकूण रक्‍कम २.०८ लाख रुपये इतकी असून त्‍याशिवाय त्‍याच्‍याकडून २९ हजार रुपयांची रोखही पोलिसांनी जप्‍त केली. हा युवक अमलीपदार्थ कुणाकडून आणत होता, याचा सध्‍या पोलिस तपास घेत आहेत, अशी माहिती मडगावचे पोलिस उपअधीक्षक संतोष देसाई यांनी दिली