सासष्‍टी, फातोर्डातील प्रभाग-९ मधील मार्ले परिसरात पदपथ सुशोभीकरण, सोलर दिवाबत्तीची सोय तसेच विविध ठिकाणी गटार उभारणी आणि त्यावर फरशा अशाप्रकारे ५० लाख रुपयांचा निधी खर्चून पूर्ण करण्यात आलेल्या विकासकामांचे शुक्रवारी (ता.१२) उद्‌घाटन करण्यात आले.

यावेळी फातोर्डाचे आमदार विजय सरदेसाई, स्थानिक नगरसेवक रवींद्र ऊर्फ राजू नाईक, मुख्याधिकारी गौरीश शंखवाळकर, पालिका अभियंता दीपक देसाई, ठेकेदार बालेश देसाई व अन्य उपस्थित होते.

पालिकेकडून ३२ लाख रुपयांचा निधी वापरून मार्लेत पदपथ सुशोभीकरण, त्यावर बाकडे, तसेच सोलर दिवाबत्तीची सोय करण्यात आली आहे. याखेरीज एसटी निधीतून १८ लाख रुपयांची निविदा काढून प्रभागातील चार वेगवेगळ्या ठिकाणी गटार बांधले तसेच त्यावर फरशा घालण्यात आल्या आहेत.

जीएसटीसह एकूण ५० लाख रुपयांची विकासकामे करण्यात आली आहेत व त्यांचे शुक्रवारी जुझे मारिया मिरांडा यांच्या हस्ते उदघाटन करण्यात आले, अशी माहिती नगरसेवक नाईक यांनी दिली.

काहीजणांकडून विरोध

एसटी निधीतून आपल्या प्रभागात झालेल्या विकासकामांमुळे काहींना पोटदुखी झाली आणि ही कामे होऊ नयेत म्हणून अडथळे आणण्याचे प्रयत्न झाले. मात्र, आमचे आमदार सरदेसाई यांनी या विकासकामांचा पाठपुरावा करून ती मार्गी लावण्यासाठी सहकार्य केले. त्याबद्दल आम्ही सरदेसाई यांचे आभार मानतो, असे नगरसेवक रवींद्र ऊर्फ राजू नाईक यांनी सांगितले.