मडगाव: चंद्रवाडा–फातोर्डा परिसरात शनिवारी सकाळी एक हृदयद्रावक घटना घडली. घरातील बेडरूमच्या बाल्कनीतून उडी मारून ७३ वर्षीय वृद्धाने जीवन संपविल्याची घटना समोर आली आहे. जोस फोन्सेका असे मृत व्यक्तीचे नाव असून, या प्रकरणी फातोर्डा पोलिस ठाण्यात अनैसर्गिक मृत्यूची नोंद करण्यात आली आहे.

पोलिसांनी दिलेल्या माहितीनुसार, जोस फोन्सेका हे मागील एक वर्षापासून मानसिक तणावाखाली होते. त्यांच्यावर वैद्यकीय उपचार सुरू होते. ते आपल्या पत्नीसोबत चंद्रवाडा–फातोर्डा येथील निवासस्थानी राहत होते. शनिवारी सकाळच्या सुमारास त्यांनी बेडरूमला आतून कडी लावली. त्यानंतर बाल्कनीतून खाली उडी घेतली.

या घटनेत फोन्सेका गंभीर जखमी झाले. परिसरातील नागरिकांच्या मदतीने त्यांना तातडीने जिल्हा इस्पितळात दाखल करण्यात आले. मात्र उपचार सुरू असतानाच डॉक्टरांनी त्यांना मृत घोषित केले. घटनेची माहिती मिळताच फातोर्डा पोलिसांनी घटनास्थळी धाव घेतली.

पोलिस निरीक्षक नॅथन आल्मेदा यांच्या मार्गदर्शनाखाली उपनिरीक्षक सुखदा प्रभुदेसाई या प्रकरणाचा पुढील तपास करीत आहेत. या घटनेमुळे परिसरात हळहळ व्यक्त करण्यात येत असून, मानसिक आरोग्याच्या प्रश्नांकडे गांभीर्याने पाहण्याची गरज पुन्हा एकदा अधोरेखित झाली आहे.