डिचोली : खाण कंपन्यांकडून नुकसान भरपाई मिळावी. या मागणीसाठी अखिल भारतीय किसान सभेच्या बॅनरखाली लढा देणारे खाणग्रस्त मये गावातील शेतकरी पुन्हा एकदा एकवटले आहेत. संबंधित खाण कंपन्यांनी थकीत नुकसान भरपाई त्वरित द्यावी, अशी मागणी या शेतकऱ्यांनी केली आहे. शेतकऱ्यांना नुकसान भरपाई मिळेपर्यंत यापुढे खनिज वाहतूक करण्यास देणार नाही, असा इशारा अखिल भारतीय किसान सभेने दिला आहे. (Goa mining News Updates)

अखिल भारतीय किसान सभेचे कॉम्रेड जतीन नाईक आणि व्हिक्टर ब्रागांझा यांच्या नेतृत्वाखाली मंगळवारी मयेतील शेतकऱ्यांनी (Farmer) डिचोलीच्या उपजिल्हाधिकारी कार्यालयात निवेदन सादर केले. चौगुले आणि वेदांता कंपनीकडून मयेतील शेतकऱ्यांना नुकसान भरपाई देण्यास टाळाटाळ करण्यात येत आहे. संबंधित खाण कंपनींकडून गेल्या सहा वर्षांपासूनची (2014 ते 2019) नुकसान भरपाई मिळावी. या मागणीसाठी किसान सभेच्या बॅनरखाली मयेतील शेतकरी संघर्ष करत आहेत.

आपल्या मागणीकडे लक्ष वेधण्यासाठी गेल्यावर्षी 25 ऑक्टोबर रोजी डिचोलीत (Bicholim) भव्य मोर्चा काढून शेतकऱ्यांनी शक्तिप्रदर्शन केले होते. मात्र शेतकऱ्यांच्या मागणीकडे आतापर्यंत दुर्लक्ष झाले आहे. त्यातच गेल्या महिन्यापासून पैरा येथील चौगुलेच्या खाणीवरून ई-लिलावाच्या खनिजाची वाहतूक सुरु आहे. यामुळे अस्वस्थ बनलेले शेतकरी नुकसान भरपाई मिळावी. यासाठी पुन्हा एकत्रित आले आहेत.

खनिज वाहतूक बेकायदा
पैरा येथील चौगुलेच्या खाणीवरुन (Mining) होणारी ई-लिलावाच्या खनिजाची वाहतूक पूर्णपणे बेकायदा आहे. असे भारतीय किसान सभेचे नेते कॉम्रेड जतीन नाईक यांनी स्पष्ट केले. जोपर्यंत शेतकऱ्यांना नुकसान भरपाई मिळत नाही. तोपर्यंत खनिजाची वाहतूक करण्यास देणार नाही. पोलिसांनी शेतकऱ्यांना रोखण्याचा प्रयत्न केल्यास पोलिसांविरोधातही दाद मागण्यात येईल, असा इशाराही जतीन नाईक यांनी दिला आहे.

...तोपर्यंत लढा चालूच ठेवण्याचा निर्धार
थकीत नुकसान भरपाई मिळावी यासाठी किसान सभेमार्फत डिचोलीच्या मामलेदारांकडे खटला चालू आहे, अशी माहिती अखिल भारतीय किसान सभा मयेचे अध्यक्ष कृष्णा गडेकर यांनी दिली. नुकसान भरपाई मिळेपर्यंत आम्ही स्वस्थ बसणार नाही, असा इशारा त्यांनी दिला आहे.