नवा बोरी पूल ही काळाची गरज आहे. सरकार जुना पूल पडेपर्यंत थांबू शकत नाही. त्याचसाठी सरकार नव्या पुलासाठी आग्रही आहे. आपण शेतकऱ्यांशीही बोललो आहे.

त्यांनाही नव्या बोरी पुलाची आवश्यकता आहे, हे माहीत आहे. मात्र प्रश्र्न आहे तो भू संपादनाचा. पुलासाठी कुणाची जागा संपादित करायची यासाठी शेतकऱ्यांत गुंता आहे, असे पर्यावरणमंत्री आलेक्स सिक्वेरा यानी आज मडगावात पत्रकारांना सांगितले.

आज जिल्हाधिकारी प्रशासन इमारतीच्या सभागृहात आलेक्स सिक्वेरा यांनी लोकांची गाऱ्हाणी ऐकली. त्यानंतर ते पत्रकारांशी बोलत होते.

त्यानी सांगितले की आम्ही शेतकऱ्यांना रस्ता आखणीचे सात प्रस्ताव ठेवले. त्यांनी एक प्रस्ताव दिला आहे, त्याचे सर्वेक्षण व पहाणी दोन चार दिवसांपूर्वी झाली आहे. या अहवालाचाही अभ्यास करावा लागेल.

बोरीपुलाबद्दल गडकरींशी बोलणार!

दरम्यान, ११ जुलै रोजी केंद्रीय रस्ते वाहतूक व महामार्ग मंत्री नितीन गडकरी गोव्यात येणार आहेत. आपण त्यांची शेतकऱ्यांच्या शिष्टमंडळासह भेट घेणार आहे व नव्या बोरी पुलासंदर्भात चर्चा करणार असल्याचेही मंत्री सिक्वेरा यांनी सांगितले. हा नवा पूल बांधताना एकाचेही घर पाडले जाणार नाही किंवा शेत जमिनी नष्ट होऊ देणार नाही याची दक्षता घेणार असल्याचेही मंत्री सिक्वेरा यांनी स्पष्ट केले.