बाजारात मोठ्या प्रमाणात आंबे दाखल होऊ लागल्याने मानकुरादसह इतर आंब्यांच्या दरात घट झाली आहे. आंब्यांची आवक वाढल्याने दर आणखी कमी होण्याची शक्यता आहे.

पणजी बाजारात मध्यम आकाराचा मानकुराद दीड हजार ते बाराशे रुपये प्रति डझन दराने विकला जात होता. हापूस हजार ते आठशे रुपये दराने विकला जात असून महिन्याभरापूर्वी 5 हजार रुपये प्रतिडझन दराने मानकुराद विकला जात होता.

मानकुराद आंब्यासोबतच हापूस, पायरी, शेंदुरी, शाबेर अशा विविध प्रकारचे आंबे बाजारात दाखल झाले असून हजार आठशे दरम्यान प्रतिडझन दराने विकले जात आहे.

राज्यात मोठ्या प्रमाणात उकाडा वाढल्याने नागरिक विविध शीतपेयांचा आधार घेत आहेत. त्यातही लिंबू पाणी, लिंबू सरबत, लिंबू सोड्याचे सेवन अधिक प्रमाणात होत असल्याने लिंबूना मागणी वाढली आहे.

मागणी एवढा पुरवठा होत नसल्याने जो लिंबू 2 रुपयांना एक मिळत होता त्याच लिंबाला आत्ता 5 ते 7 रुपये नागरिकांना मोजावे लागत आहेत. बाजारात पिकलेले फणस दाखल झाले असून 50 रुपये प्रती वाटा दराने फणसाचे गरे विकले जात आहेत.