सासष्टी: जे मतदार भाजपला मते न देण्याची शक्यता आहे, अशांना मतदार यादीतून वगळून बनावट मतदारांना घुसविण्याचे प्रयत्न सघ्या मडगावात प्रयत्न सुरू आहेत. तसेच अशा प्रयत्नांविरोधात आवाज उठविणाऱ्यांना व निवडणूक अधिकाऱ्यांकडे तक्रारी करणाऱ्यांविरोधात ‘बीएलए’ व ‘बीएलओ’ खोट्या तक्रारी देत आहेत.

या बीएलए व बीएलओ ना निलंबित करावे, अशी मागणी काँग्रेसचे नेते व शेडो कौन्सिलचे निमंत्रक सावियो कुतिन्हो यांनी मडगावात घेतलेल्या पत्रकार परिषदेत केली. ‘एसआयआर’ प्रक्रियेसंदर्भात आम्ही जे मतदारांना जागृत करण्याच्या कामाची निवडणूक अधिकारी प्रशंसा करीत असताना दुसऱ्या बाजूने मात्र, आमच्या विरोधात ‘बीएलए’, ‘बीएलओ’ तक्रारी करीत आहेत.

या तक्रारींमागे मडगावचे आमदार दिगंबर कामत हे सूत्रधार आहेत, असेही कुतिन्हो यांनी सांगितले. नावेली येथील जिल्हा ग्रंथालय आवारात कामात हस्तक्षेप केला म्हणून ‘बीएलओ’ दामोदर निगारे यांनी आपल्या विरोधात पोलिस तक्रार केली. मात्र जिल्हा वाचनालयाने ‘आरटीआय’ अंतर्गत दिलेल्या माहितीनुसार वाचनालय आवारात ‘एसआयआर’ प्रक्रिया कधी झालीच नाही, असे त्यांनी स्पष्ट केले आहे.

मंत्र्यांना मुख्यमंत्र्यांनी वेळीच अश्वस्त करणे गरजेचे आहे. जर असे झाले नाही, तर भविष्यात भाजपचा पाडाव अटळ असल्याचे कुतिन्हो यांनी सांगितले. ज्या मतदारांची नावे मतदार यादीत नाहीत किंवा त्यांना सुनावणीसाठी बोलावले असेल तर त्यांनी जरूर सुनावणीस हजर रहावे, आपली कागदपत्रे सादर करावी, असे मत सावियो कुतिन्हो यांनी तमाम मतदारांना केले आहे.