मडगाव: पोलिस असल्याचे सांगून मोबाईलवर किंवा ऑनलाईन पद्धतीने फसवणूक करणाऱ्या भामट्यांचा उच्छाद दिवसेंदिवस वाढतच चालला आहे. त्यातच फातोर्डा येथील एका महिलेला आपण पोलिस अधिकारी असल्याचे सांगून लाखो रुपयांना टोपी घालण्याचा प्रयत्न एका भामट्याने मोबाईलवरून केला.

मात्र, या महिलेच्या जागरूकतेमुळे त्याचा प्रयत्न असफल ठरला. ही घटना फातोर्डा पोलिस ठाण्याच्या हद्दीत घडली. डोंगरवाडा-फातोर्डा येथील वैशाली भोसले यांनी याप्रकरणी फातोर्डा पोलिस स्थानकात १० डिसेंबर रोजी अज्ञात भामट्याविरोधात तक्रार नोंदविली आहे.

ही घटना फातोर्डा (Fatorda) पोलिस ठाण्याच्या हद्दीत घडली. डोंगरवाडा-फातोर्डा येथील वैशाली भोसले यांनी याप्रकरणी फातोर्डा पोलिस स्थानकात १० डिसेंबर रोजी अज्ञात भामट्याविरोधात तक्रार नोंदविली आहे.

अधिक माहिती अशी की, वैशाली भोसले यांच्याशी या भामट्याने व्हॉट्सॲपवरून (WhatsApp) कॉल करत संपर्क साधला. तुम्ही मनी लॉंड्रिंग तसेच भूबळकाव प्रकरणामध्ये सहभागी आहात, असे सांगून त्यांना घाबरविण्याचा प्रयत्न केला. हा भामटा दोन वेगवेगळ्या मोबाईल क्रमांकांवरून त्यांना व्हॉटस ॲपवरून भोसले यांच्याशी संपर्क साधत होता. नंतर त्याने हे प्रकरण मिटविण्यासाठी मालाड (मुंबई) येथील फेडरल बँकेमध्ये २ लाख २० हजार ९६८ रुपये आपल्या खात्यात ट्रान्स्फर करण्यास सांगितले.

मात्र, भोसले यांनी सावध होऊन कोणताही आर्थिक व्यवहार न करता पोलिसांत तक्रार नोंदविली. पोलिसांनी कलम ३१८ (४), ३१९ (२) तसेच माहिती व तंत्रज्ञान कायद्याखाली हे प्रकरण नोंदवून घेतले आहे. पोलिस निरीक्षक नॅथन आल्मेदा याप्रकरणी पुढील तपास करीत आहेत.