Fake FDA officer in Calangute

पणजी: राज्यात आतापर्यंत ‘कॅश फॉर जॉब’ किंवा ऑनलाईन पद्धतीने फसवणुकीचे अनेक प्रकार घडले असून त्यांची चौकशीही सुरू आहे. मात्र, आता चक्क अन्न व औषध प्रशासनाचा (एफडीए) अधिकारी असल्याचे सांगून एक तोतया कळंगुट परिसरातील अन्न व्यावसायिकांना धमकावत आहे. विशेष म्हणजे, आरोग्य मंत्री विश्‍वजीत राणे यांनीच ‘एक्स’वर याची माहिती दिली असून त्या व्यक्तीपासून सावध राहण्याचा सल्ला दिला आहे.

सविस्तर माहिती अशी की, सोयरू नाईक तुयेकर ऊर्फ सर्वेश नाईक तुयेकर असे नाव असलेला व्यक्ती स्वतःला अन्न व औषध प्रशासन (एफडीए) खात्याचा अधिकारी म्हणून सांगत कळंगुट परिसरात फिरत आहे. तो अस्खलित कोकणी बोलून अन्न व्यवसाय चालविणाऱ्या लोकांकडे पैसे मागत आहे, असे आरोग्यमंत्री विश्वजीत राणे यांनी ‘एक्स’वर म्हटले आहे.

मंत्र्यांनी म्हटले आहे, की ती व्यक्ती दूरध्वनीद्वारे संबंधित लोकांना धमकावते आणि त्यांच्याकडून रोख रक्कम मागते. जर तुम्हाला या व्यक्तीविषयी काही माहिती असेल किंवा तो तुमच्या संपर्कात आला असेल, तर कृपया तात्काळ संबंधित अधिकाऱ्यांना कळवा, असे आवाहनही मंत्री राणे यांनी केले आहे.

दोन मोबाईल क्रमांकांचा वापर

या व्यक्तीने ८७४७८५०८८५ आणि ९३५६२७८८३६ या दोन क्रमांकांवरून फोन केले आहेत. मात्र, ‘एफडीए’चा या व्यक्तीशी काडीमात्र संबंध नाही. अशा बनावट व्यक्तींच्या जाळ्यात न अडकता सावध राहावे. या प्रकाराबाबत अनेक तक्रारी प्राप्त झाल्या असून एफडीए संचालकांना संबंधित व्यक्तीविरोधात एफआयआर नोंदविण्याचे निर्देश दिले आहेत. दोषींवर कठोर कारवाई केली जाईल.