गोवा राज्यात काजू उत्पादक मोठ्या प्रमाणावर असून गोव्यात काजूच्या फळापासून फेणी हे पेय तयार केले जाते. फेणी ही दारूसारखीच नशा येणारी आहे असा समाज पसरला होता. मात्र हा अपप्रचार दूर करण्यासाठी राज्याने फेणीला पेयाला 'हेरिटेज ड्रिंक' म्हणून जाहीर केलंय.

फेणी धोरणाची अंमलबजावणी सुरू झाली आहे. गोव्याने काही राज्यांना त्यांच्या संबंधित कार्यक्षेत्रात फेणी विकण्याची परवानगी देण्यासाठी पत्र लिहिले होते. मात्र अद्याप त्यांच्याकडून हवा तसा प्रतिसाद मिळाला नाहीय. .

या बाबत उत्पादन शुल्क अधीक्षक महेश कोरगावकर म्हणाले की, "फेणीला 'हेरिटेज ड्रिंक' म्हणून जाहीर केल्यानंतर फेणीची मागणी आणि विक्री तेजीत होईल असे वाटले होते. मात्र अनेक राज्ये फेणी विक्रीला परवानगी देण्यास तयार नसल्याने आमचे काम अवघड होत आहे. त्यामुळे उत्पादन शुल्क विभागाने या हेरिटेज ड्रिंककडे लोकांचे लक्ष वेधण्यासाठी एक निर्णय घेतला आहे."

गोव्याच्या उत्पादन शुल्क विभागाने दाबोळी आणि मोपा विमानतळावर फेणी तयार करण्यासाठी जी ऊर्धपातन प्रक्रिया केली जाते त्या भट्टीची प्रतिकृती बसवण्याचा निर्णय घेतला आहे. यामुळे विमानतळावर येणाऱ्या प्रवाशांचे या फेणी उद्योगाकडे लक्ष वेधले जाऊन फेणीला चांगले दिवस येण्याची शक्यता वर्तवली जातेय.

मात्र यासोबतच गोवा सरकार फेणी उद्योगासाठी कितपत प्रयत्न करते यावर सर्व अवलंबून असल्याचे इथल्या स्थानिकांचे म्हणणे आहे. फेणीची एक वेगळी ओळख असून तिला कोणत्याही नवीन बाजारपेठेत चटकन प्रवेश करणे कठीण आहे. त्यामुळे फेणी विक्रीसाठी फक्त फेणी महोत्सवाचे आयोजन करणे एवढेच पुरेसे नाही.

अधीक्षक कोरगावकर म्हणाले की, अन्न आणि औषध प्रशासन विभाग (FDA) फेणी बाटलीबंद करताना अल्कोहोलयुक्त पेयाची मात्रा तपासते. त्यामुळे बाजारात चांगलेच उत्पादन जाऊ शकते.