Goa Tourism Development Corporation: गोवा पर्यटन विकास महामंडळाने माहिती आणि प्रसिध्दी खात्यातर्फे उदयपूर (राजस्थान) येथे आयोजित गोवा @ 60 या आशयावरील रोड शोचा शुभारंभ काल राजस्थानच्या पर्यटन खात्याच्या उपसंचालक शीखा सक्सेना यांच्या हस्ते झाला. सेलेब्रेशन मॉल, उदयपूर येथे आयोजित या सोहळ्यावेळी राजस्थानच्या माहिती आणि प्रसिध्दी खात्याचे उपसंचालक कमलेश शर्मा हेही उपस्थित होेते. या रोड शोला उत्तम प्रतिसाद लाभला.

हा शो या ठिकाणी 18 सप्टेंबर 2022 पर्यंत चालू राहणार असून तो सर्व लोकांसाठी खुला असेल. शुभारंभी सोहळ्यानंतर कार्यक्रमस्थळी गोमंतकीय कलाकारांनी लोकनृत्याचे सादरीकरण केले त्याला उपस्थित प्रेक्षकांनी जोरदार प्रतिसाद दिला.

याप्रसंगी गोवा पर्यटन खात्याचे उपसंचालक राजेश काळे, जीटीडीसीचे (Goa Tourism Development Corporation) उपसरव्यवस्थापक दीपक नार्वेकर, माहिती अधिकारी ऑल्विन परेरा, गोवा पर्यटन खात्याचे सहायक पर्यटन संचालक रॉडलीन मास्कारेन्हास आणि माहिती खात्याचे सहायक माहिती अधिकारी किरण मुनानकर आदी उपस्थित होते.

रोड शोमुळे विविध शहरांमधील लोकांमध्ये मोठ्या प्रमाणात संबंध जुळतात. तसेच मुक्तीनंतरच्या काळात राज्याने साधलेल्या नेत्रदीपक प्रगतीचे दर्शनही देशवासियाना घडविणे शक्य होते. या रोड शोच्या माध्यमातून गोव्याच्या मुक्तीसाठी स्वातंत्र्यसैनिकांनी दिलेल्या योगदानाची माहिती लोकांना करून देण्याचा हेतू आहे, असे जीटीडीसीचे उप सरव्यवस्थापक दीपक नार्वेकर यांनी सांगितले.