पणजी: संत फ्रान्सिस झेवियर यांच्या डिएनए चाचणीची मागणी करुन गोव्यात वादंग निर्माण करणाऱ्या, आरएसएस गोवाचे माजी अध्यक्ष सुभाष वेलिंगकर यांनी झेवियर यांच्याबाबत पुन्हा वादग्रस्त विधान केले आहे. झेवियर शवदर्शन सोहळा आणि फेस्त सुरु असताना वेलिंगकरांनी पुन्हा वाद ओढावून घेतला आहे.

काय म्हणाले वेलिंगकर?

सोशल मीडियावर केलेल्या पोस्टमध्ये वेलिंगकर म्हणाले की, ''छत्रपती संभाजी महारांजाचा हल्ला परतवून पोर्तुगिज साम्राज्याचे रक्षण केले, असा चमत्कार आजही चर्च ज्याच्या शवाच्या नावावर खपवते, तो पोर्तुगिज हस्तक, मुक्त गोव्याचा Partron Saint? हे लॉजिकच बेकार आहे. झेवियरला पोर्तुगालच्या राजाने आणि पोपने धर्मांतराद्वारे भारतात पोर्तुगिज साम्राज्य-बळकट करण्यासाठी पाठवले होते. ना की भारत (India) देशाच्या रक्षणासाठी, हे तर अडाण्यालाही माहिती आहे. हो ना...''

डिएनए चाचणीची मागणी केली होती

संत फ्रान्सिस झेवियर यांच्या शवाची डिएनए चाचणी करावी, अशी मागणी करुन सुभाष वेलिंगकरांनी राळ उडवून दिली होती. त्यांच्या या वक्तव्यानंतर राज्यात राजकीय घमासान पाहायला मिळाले होते. वेलिंगकरांनी केलेल्या वक्तव्याचा निषेध करत ख्रिस्ती संघटनांनकडून राज्यातील विविध पोलिस ठाण्यात तक्रारी दाखल करण्यात आल्या होत्या.

वेलिंगकरांचे वक्तव्य समाजात तेढ निर्माण करते असे म्हणत राज्यातील ख्रिस्ती संघटना रस्त्यावर उतरल्या होत्या. वेलिंगकरांना जोपर्यंत अटक होत नाही तोपर्यंत आम्ही स्वस्त बसणार नाही असा पवित्राही या संघटनांनी घेतला होता. तर दुसरीकडे, वेलिंगकरांच्या वक्तव्याच्या समर्थनार्थही राज्यातील हिंदू संघटना एकवटल्या होत्या. वेलिंगकरांचे वक्तव्य बरोबर असून संत झेवियर यांच्या शवाची डिएनए चाचणी करण्यात यावी अशी मागणी त्यांनीही केली होती.