Rohan Khaunte: पणजीतील स्मार्ट सिटीच्या कामामुळे सर्वसामान्य नागरिक, वाहनधारकांना तर त्रास होतच आहे, पण लोकप्रतिनिधीही शहरातील रस्तेकामांमुळे त्रासले आहेत. खुद्द पर्यटन मंत्री रोहन खंवटे यांनीच याबाबत त्यांची व्यथा मांडली आहे.

गोवा विधानसभेच्या अर्थसंकल्पीय अधिवेशनाला आज, सोमवारपासून सुरवात झाली आहे. त्यापुर्वी पर्यटन मंत्र्यांनी पत्रकारांच्या प्रश्नांना उत्तरे देताना याबाबत मत व्यक्त केले.

गोव्यातील वाहतूक कोंडीला स्मार्ट सिटीची कामे जबाबदार आहेत का, असे विचारले असता मंत्री खंवटे म्हणाले की, स्मार्ट सिटीची कामे हा पणजीतील मोठा मुद्दा बनला आहे. मला स्वतःलाही दुचाकी घेऊन फिरावे लागते. जो त्रास सर्वांना भोगावा लागत आहे तो आमदारांनाही भोगावा लागत आहे, असे ते म्हणाले.

पर्यटक हे आमच्यासाठी अतिथी आहेत. प्रत्येक पर्यटक वाईट नसतो. आणि प्रत्येकवेळी स्थानिकही चुकीचे नसतात. कुणीही कायदा हातात घेऊ नये. कारवाईसाठी पोलिस आहेत. पर्यटकांवरील हल्ल्याच्या घटना भविष्यात घडू नयेत. पर्यटन क्षेत्रातील बेकायदा गोष्टी अजिबात मान्य करणार नाही. बेकायदा टॉवर्सना विरोध आहे गोवेकरांची कमाई व्हावी, त्यांनी चांगले कमवावे, असाच आमचा हेतू आहे, असेही ते म्हणाले.