मडगाव : नव्या गोवा विधानसभेत यावेळी दक्षिण गोव्यातून एकही महिला आमदार नसेल. कारण कोणीच महिला निवडून आलेल्या नाहीत. मावळत्या सभागृहात एलिना साल्‍ढाणा या दक्षिण गोव्यातील एकमेव आमदार होत्या. 2012 मध्ये त्या कुठ्ठाळी मतदारसंघातून भाजप (BJP) उमेदवारीवर प्रथम बिनविरोध व नंतर 2017 मध्ये पुन्हा निवडून आल्या होत्या. पहिल्या कार्यकाळात तर त्या मंत्रिपदीही होत्या.

यावेळी कुठ्ठाळीतून एलिना पुन्हा निवडणुकीस (Election) उभ्या होत्या, पण त्या पराभूत झाल्या. निवडणुकीच्या तोंडावर त्या भाजपमधून आम आदमी पक्षात गेल्या होत्या. मात्र त्यांच्या पदरी अपयश आले. सांगे मतदारसंघातून सावित्री कवळेकर (Savitri Kavalekar) यांनीही अपक्ष म्हणून निवडणूक लढविली होती, पण त्यांनाही अपयशाचा सामना करावा लागला. या दोन्ही महिला पराभूत झाल्याने दक्षिण गोव्यातून कोणीच महिला यावेळी विधानसभेत असणार नाही. उलट उत्तर गोव्यातून (goa) दिव्या राणे, जेनिफर मोन्सेरात व दिलायला लोबो या तीन महिला असतील. त्यातील दोघी भाजपच्या तर तिसरी काँग्रेसची (Congress) आमदार आहे.

यापूर्वी संघप्रदेश काळात दक्षिण गोव्यातून एलियु मिरांडा यांनी विधानसभेत प्रतिनिधीत्व केले होते. सुलोचना काटकर याही आमदार होत्या, पण त्या लोकनियुक्त नव्हे तर सरकारनियुक्त होत्या. त्यावेळी कोणी महिला आमदार (MLA) नसल्याने सरकारने काटकर तसेच फिलीस फारिया व संगीता परब अशा तिघांची नियुक्ती केली होती. परब यांना राज्यमंत्रीही केले होते.