मडगाव: केपेचे आमदार एल्‍टन डिकॉस्‍ता हे आपल्‍याला भाजपमध्‍ये आमंत्रण आहे, असे जे सांगतात ते धांदांत खोटे असून डिकॉस्‍ता यांना भाजपात येण्‍याचे कुणीही निमंत्रण दिलेले नाही आणि भाजपाला त्‍यांची गरजही नाही, असे वक्‍तव्‍य मुख्‍यमंत्री प्रमोद सावंत यांनी काल फातर्पा येथे झालेल्‍या कार्यकर्त्‍यांच्‍या मेळाव्‍यात बोलताना केले.

केपे भाजप मंडळाच्या फातर्पा येथील श्री शांतादुर्गा भूमिपुरुष सप्तकोटेश्वर संस्थान सभागृहात झालेल्या मेळाव्यात ते बोलत होते. यावेळी प्रदेशाध्यक्ष दामू नाईक, भाजपचे प्रदेश उपाध्यक्ष बाबू कवळेकर, राज्य सचिव सर्वानंद भगत, दक्षिण गोवा अध्यक्ष प्रभाकर गावकर, जिल्हा पंचायत अध्यक्ष संजना वेळीप,

उपाध्यक्ष सिद्धार्थ गावस देसाई, जि.पं. सदस्य खुशाली वेळीप व शाणू वेळीप, फातर्पाच्या सरपंच मनिषा दिवाकर देसाई, बार्सेचे सरपंच मोहन गावकर, खोलाच्या सरपंच प्रियांका वेळीप यावेळी उपस्थित होत्या. यावेळी प्रदेशाध्‍यक्ष दामू नाईक यांचा मुख्‍यमंत्र्यांच्‍या हस्‍ते सत्‍कारही करण्‍यात आला. केपेत होत असलेल्या विकासाचे श्रेय आमदारांनी घेऊ नये. ही कामे कवळेकर यांनी मंजूर करून घेतली होती,असे मुख्यमंत्री म्हणाले.

बाबू कवळेकर, माजी उपमुख्यमंत्री

केपेे मतदारसंघात शाळा इमारतींची दुरुस्ती, भूमिगत वीजवाहिन्या, विज पुरवठ्यासंबंधीत विविध कामे अशा सर्व विकासकामांचे प्रस्ताव आपण मंजूर करून घेतले होते. विद्यमान आमदार त्या विकासकामांच्या शुभारंभाचे नारळ वाढवण्याचे व उद्‍घाटने करण्याचे तेवढे काम करत आहेत. योग्यवेळी आपण यासंदर्भातील कागदपत्रे उघड करणार आहे.