पेडणे: गोव्याच्या सीमेवर कळणे गावात आज हत्तींचे दर्शन झाले. हे तीन हत्ती असल्याचे कळणेतील ग्रामस्थांनी सांगितले. सिंधुदुर्गतील कळणे हा गाव हसापुर-पेडणे गावाजवळ आहे. कळणेतील बागायतीत या हत्तींनी कवाथे व पोफळीचे रोपे उपटून टाकली आहेत. यामुळे कळणेतील शेतकऱ्यांचे नुकसान झाले.

कळणे हा गाव हसापूरनजीक असल्याने तिथे हत्ती आल्याने दहा वर्षांपूर्वी गोवा हद्दीतील इब्रामपुर ,चांदेल - हसापुर ,तळर्ण - हळर्ण , वझरी ,पूर्वा ,तोर्से आदी गावात घुसून हत्तीच्या कळपाने बागायतीची केलेली हानी व दहशतीच्या आठवणींनी या गावातील शेतकऱ्यांत भीती पसरली आहे. दरम्यान या संबधी पेडणे वन कार्यालयातून सांगण्यात आले की, कळणे भागात हत्ती आले होते, स्थितीवर आमचे लक्ष आहे.