सोनाली फोगाट हत्याप्रकरणात (Sonali Phogat Murder Case) संशयित एडवीन नुनीस, दत्तप्रसाद गावकर व रामा मांद्रेकर यांना सात दिवसांची न्यायालयीन कोठडी सुनावली आहे. एनडीपीएस (Narcotic Drugs and Psychotropic Substances Act) कायद्याअंतर्गत त्यांच्यावर कारवाई करण्यात आली आहे. याप्रकरणी पुढील सुनावणी सहा सप्टेंबर रोजी होणार आहे.

अभिनेत्री व भाजप नेत्या सोनाली फोगाट यांच्या खून प्रकरणात गोवा पोलिसांनी सुधीर सांगवान व सुखविंदर पाल सिंग यांना अटक केली. त्यानंतर पोलिसांनी गुन्ह्याशी निगडित कर्लिसचा मालक तसेच पेडलर रामदास मांद्रेकर व दत्तप्रसाद गावकर यांना अटक केली होती. काही दिवसांपूर्वी न्यायालयाने दोघांना पाच दिवसांची पोलीस कोठडी सुनावली होती. दरम्यान, आज न्यायालयाने एडवीन नुनीस, दत्तप्रसाद गावकर व रामा मांद्रेकर यांना सात दिवसांची न्यायालयीन कोठडी सुनावली आहे.

दरम्यान, सोनाली यांच्या मूळ गावी हिस्सारला गेलेल्या गोवा पोलिस पथकाने सोनाली यांच्या सर्व आर्थिक व्यवहारांचा तपशील मिळवला. हा तपशील या हत्या प्रकरणात महत्त्वाचा पुरावा ठरू शकेल, अशी माहिती उत्तर गोव्याचे पोलिस अधीक्षक शोभित सक्सेना यांनी दिली आहे.