वास्को: आज मार्गशीर्ष पौर्णिमेच्या दिवशी दत्तात्रेय जयंती मुरगाव तालुक्यात मोठ्या भक्तीमय वातावरणात साजरी करण्यात आली. या पार्श्वभूमीवर तालुक्यातील सर्व मंदिरांमध्ये भक्तीमय वातावरण होते. तसेच तालुक्यात सर्वत्र दुपारनंतर महाप्रसादाचे आयोजन करत या सोहळ्याची सांगता करण्यात आली.

(Dutt Jayanti was celebrated in Mormugao taluka in a devotional atmosphere)

आज बुधवारी ( दि. 7 ) रोजी श्री दत्त जयंती उत्सव मोठ्या उत्साहाने सर्वत्र साजरा करण्यात आला. पहाटेपासून विविध ठीकाणी मंदिरात खास करून श्री साई व श्री दत्त मंदिरात विविध धार्मिक विधी सुरू झाल्या. दिगंबरा दिगंबरा श्रीपाद वल्लभ दिगंबरा असा नाद प्रत्येक मंदिरात पहाटेपासून ऐकू येत होता. सकाळपासून विविध धार्मिक विधी पार पडले. तर दुपारी आरती व तीर्थ प्रसादाचा कार्यक्रम झाला.

वास्कोतील गोवा शिपयार्ड समोरील श्री दत्त साई मंदिरात, टॅक्सी स्टँण्डकडील साई मंदिरात हेडलॅण्ड सडा येथील साई मंदिरात, नवेवाडे, उपासनगर, बोगमाळो येथील साई मंदिरात, ओरुले दत्तवाडी संस्थानात, बोगमाळो गाळींत येथील दत्त मंदिरात जयंती मोठया उत्साहात साजरा करण्यात आली. बहुतेक ठिकाणी भाविकांसाठी दुपारी महाप्रसादाची सोय करण्यात आली होती. याचा शेकडो भाविकांनी लाभ घेता

दरम्यान संध्याकाळच्या सत्रात दत्त जन्म पाळणा झाला. याप्रसंगी भाविकांनी उपस्थिती लावून दत्त जन्म सोहळा साजरा केला. नंतर आरती व तीर्थ प्रसाद झाला. तसेच प्रत्येक ठिकाणी भजनाचा कार्यक्रम व काही ठिकाणी रात्री श्रींची पालखी मिरवणूक काढण्यात आली व शेवटी आरती व तीर्थ प्रसाद झाला.