पणजी : गोव्यात आसानी चक्रीवादळामुळे आधीच ढगाळ वातावरण गेल्या काही दिवसांपासून दिसत आहे. यातच म्हापसा आणि पणजी परिसरात काही ठिकाणी धुळीचे मोठमोठे लोट उठल्याचं चित्र होतं. म्हापशातील बोडगेश्वर मैदानात आणि तालगावातील चर्च परिसरातही वेगवान वाऱ्यामुळे धुळीचे लोट उडाले.

बंगालच्या उपसागरात आलेल्या आसानी चक्रीवादळामुळे (Cyclone) महाराष्ट्रासह गोव्याच्या काही भागात 40-50 किमी प्रतितास वेगाने वारे वाहात आहेत. त्यामुळे बुधवारी संध्याकाळी काहीकाळ गोव्यात अनेक ठिकाणी धुळीचे लोट उडाले. जवळपास 10-15 मिनिटे धुळीच्या वादळाचा खेळ सुरु होता. म्हापशातील बोडगेश्वर मैदान आणि ताळगावातील चर्च परिसरात धुळीचे लोट उठल्याने काही काळ दृष्यमानताही कमी झाली होती.

पावसाच्या (Rain) दिवसात अशाप्रकारची वादळं होत असतात. मात्र काही लोकांनी याचे व्हिडीओ सोशल मीडियावर शेअर केले आणि नेटकऱ्यांनी वादळ पाहून आश्चर्य व्यक्त केलं. वाऱ्यासह धुळीचे लोट आणि वाळूचे कणही हवेत पसरल्याने काही काळ परिसरात गोंधळ उडाला होता. दरम्यान डिचोली आणि सत्तरी परिसरातही सकाळपासूनच ढगाळ वातावरण (Climate) पाहायला मिळालं. मात्र शुक्रवारी सकाळी काही ठिकाणी पावसाच्या सरी बरसल्याची माहिती आहे. म्हापशात 2.3 मिमी पावसाची नोंद करण्यात आली.