मडगाव: दुर्गा-चिंचोणे येथील भर लोकवस्तीतील एक बंद घर फोडण्याचा प्रयत्न बुधवारी दुपारी घडला. शेजाऱ्यांनी विचारणा केल्यानंतर पळून जाणाऱ्या दोघांना पंच जर्सन गोम्स यांनी पकडण्याचा प्रयत्‍न केला.

मात्र चोरांंनी त्यांच्यावर हेल्मेटने हल्ला करून पळ काढला. या चोरांची छबी सीसीटीव्‍ही कॅमेऱ्यात कैद झाली. त्‍या आधारे पोलिस चोरांंचा शोध घेत आहेत. दोन अनोळखी व्यक्ती बंद घरात येताना दिसल्याने शेजारी राहणाऱ्या महिलेने विचारणा केली असता, त्यांनी संरक्षक भिंतीवरून उड्या मारल्या.

त्‍या महिलेने ही बाब पंच जर्सन गोम्स यांना सांगितली असता त्यांनी आपल्यासोबत आणखी एकाला घेत घटनास्थळी धाव घेतली. मात्र, त्यांनी हेल्मेटचा जोरदार प्रहार जर्सन यांच्या डोक्यावर केला.

दुचाकीवरून पळणारे चोर सीसीटीव्‍हीत कैद

एका कामगाराने जखमी जर्सन यांच्‍या दिशेने धाव घेताच चोर दुचाकीवरून पळून गेले. माहिती मिळाल्यावर कुंकळ्ळी पोलिसांनी घटनास्थळी धाव घेतली. जर्सन यांच्यासोबत झालेल्या झटापटीत चोरांचे घटनास्थळी पडलेले हेल्मेट सापडले. गावातील सीसीटीव्ही कॅमेऱ्यात दोन्ही संशयित चोरटे कैद झाले आहेत.