बोडगिणी-म्हापसा येथे अमली पदार्थविरोधी कक्षाच्या पथकाने मंगळवारी मध्यरात्रीच्या सुमारास छापा टाकून 60 ग्रॅम मेटाएम्फेटामाईन ड्रग्ज जप्त करून आल्त-म्हापसा येथील अनिल गडेकर याला अटक केली.

जप्त केलेल्या ड्रग्जची किंमत आंतरराष्ट्रीय मार्केटमध्ये सुमारे 6 लाख रुपये आहे. संशयिताची पोलिस कोठडीत रवानगी केली आहे.

कक्षाच्या पोलिसांनी दिलेल्या माहितीनुसार, एक तरुण बोडगिणी परिसरात रात्रीच्यावेळी ड्रग्जची विक्री करण्यास येणार असल्याची माहिती मिळाली होती. त्यामुळे सापळा लावण्यात आला होता.

मध्यरात्रीनंतर एक तरुण त्या ठिकाणी आल्यावर पोलिसांनी त्याला ताब्यात घेऊन त्याची चौकशी केली. त्यानंतर त्याची झडती घेतल्यावर त्याच्याजवळ अमलीपदार्थ सापडले.

ड्रग्ज किट्सद्वारे त्याची तपासणी केली असता ते मेटाएम्फेटामाईन असल्याचे स्पष्ट झाले. अमलीपदार्थ प्रतिबंधक कायद्यांतर्गत त्याच्याविरुद्ध गुन्हा दाखल केला आहे.