Goa Drugs Case: राज्यात पर्यटन हंगाम सुरू असल्याने ड्रग्स विक्रेतेही भलतेच सक्रिय झाले आहेत. रात्रीच्यावेळी पर्यटकांना गाठून ड्रग्सची खुलेआम विक्री केली जात आहे.

पोलिसांनी पणजी आणि गिरी येथे केलेल्या कारवाईत 22लाखांचे ड्रग्स जप्त केले. याप्रकरणी केरळ व हैदराबाद येथील तरुणांना अटक करून त्यांची रवानगी पोलिस कोठडीत केली आहे.

एनसीबीने किनारपट्टी भागात केलेल्या कारवाईनंतर गोवा पोलिस पुन्हा जागे होऊन ‘ॲक्टीव्ह मोड’वर आले आहेत.

येथील जुन्या सचिवालय परिसरात काही ड्रग्स दलाल रात्री पर्यटकांना ड्रग्सची विक्री करत असल्याची माहिती पोलिसांच्या गुप्तचर यंत्रणेला मिळाली होती.

त्यामुळे शनिवारी संध्याकाळी या परिसरात साध्या वेशातील पोलिस तैनात केले होते. रात्री पावणेदहाच्या एक तरुण आतील रस्त्यावर संशयास्पदरित्या फिरताना व पर्यटकांशी संवाद साधताना दिसला.

त्याला ताब्यात घेऊन झडती घेतली असता त्याच्याकडे गांजा आढळून आला. पोलिसांनी त्याला अटक केली, अशी माहिती पोलिस निरीक्षक निखिल पालेकर यांनी दिली.

बनावट ग्राहकाच्या जाळ्यात शिकार

ड्रग्सविरोधी पथकाने गिरी येथे सापळा रचून केरळ येथील सेरिन सगीर (27) याला 21.20 ग्रॅम एलएसडी व 50 ग्रॅम गांजासह अटक केली. त्याच्यावर गेल्या काही दिवसांपासून पोलिसांनी पाळत ठेवली होती. बनावट ग्राहक बनवून त्याच्याकडे पाठवले असता तो जाळ्यात सापडला.

तो गेल्या 4 वर्षांपासून गोव्यात आहे. सध्या तो म्हापसा येथे भाडेपट्टीवर राहात होता. त्याचे इतर ड्रग्स विक्रेत्यांशीही संबंध असल्याने त्यांचा शोध घेण्यात येत आहे. या प्रकरणाचा तपास उपनिरीक्षक रोहन मडगावकर करत आहेत.