पणजी: राज्यातील 186 पंचायतींची निवडणूक होणार असल्याने त्यासाठी पंचायत प्रभागांचा फेररचना मसुदा तयार करण्यात आला आहे. हा मसुदा संबंधित तालुक्यातील निवडणूक नोंदणी अधिकारी (ईआरओ) यांच्या कार्यालयात 24 फेब्रुवारी ते 2 मार्चपर्यंत लोकांना तो पाहण्यासाठी तसेच त्यावर सूचना, सुधारणा तसेच दुरुस्ती करण्यासाठी खुला ठेवला आहे, अशी माहिती राज्य निवडणूक आयोगाचे (Election Commission) सचिव महादेव आरोंदेकर यांनी दिली.

आरोंदेकर यांनी बजावलेल्या सार्वजनिक नोटिशीत म्हटले आहे की, हा पंचायत प्रभाग मसुदा निवडणूक (Election) नोंदणी अधिकाऱ्यांनी तयार केला आहे. काही प्रभागांमध्ये समान मतदारांची संख्या असावी यासाठी काही बदल करण्यात आले आहेत. हे प्रभाग फेररचनेचे काम गेल्या वर्षी नोव्हेंबरपासून सुरू होते. त्यासाठी मामलेदार व संयुक्त मामलेदार यांची निवडणूक नोंदणी अधिकारी (ईआरओ) तर अव्वल कारकून व मुख्य कारकून (हेडक्लार्क) यांची साहाय्यक निवडणूक नोंदणी अधिकारी (एईआरओ) म्हणून नियुक्ती केली आहे.

याबरोबरच पंचायत निवडणुकीतील आरक्षण प्रक्रियेला गती मिळण्याचीही शक्यता आहे. यापूर्वी 2017 साली झालेल्या पंचायत निवडणुकीत 540 मतदारसंघ अनुसूचित जाती/जमाती तसेच इतर मागासवर्गीयांसाठी राखीव ठेवले होते, शिवाय सर्वसाधारण प्रवर्गातील 323 प्रभागांसह 490 प्रभाग महिलांसाठी राखीव होते. एकूण 1450 प्रभागांसाठी निवडणूक झाली होती.

पंचायतींचा कार्यकाळ 20 मे रोजी संपुष्टात

या आयोगाच्या अधिकाऱ्यांकडून मिळालेल्या माहितीनुसार 186 पंचायतींचा पाच वर्षाचा कार्यकाळ येत्या 20 मेपर्यंत संपुष्टात येणार आहे. त्यामुळे पंचायत निवडणूक तयारी सुरू झाली आहे. पंचायत प्रभाग फेररचना मसुदा अंतिम झाल्यानंतर प्रभाग जाहीर केले जातील. त्यानंतर प्रभाग आरक्षण प्रक्रिया होणार आहे. या फेररचनेवेळी प्रभागाचे सीमांकन करताना सर्व नियम विचारात घेण्यात आले आहेत.