पावसाळ्यात पूरसदृश स्थितीचा नागरिकांना सामना करावा लागू नये यासाठी पूर प्रतिबंधक उपाययोजनांकडे सरकारचे विशेष लक्ष आहे. त्यासाठी जलसिंचन खात्यातर्फे वेगवेगळ्या ठिकाणी पूर प्रतिबंधक संरक्षक भिंतींची उभारणी करण्यात येणार आहे.

आपत्कालीन व्यवस्थापन या अंतर्गत जलसिंचन खात्यातर्फे नागरिकांना शक्य त्या प्रमाणात सुरक्षा निर्माण व्हावी यासाठी सरकारतर्फे सहकार्य करण्यात येईल, असे आश्वासन आमदार डॉ. दिव्या राणे यांनी दिले.

पर्ये - सत्तरी येथे सुमारे 86 लाख रुपये खर्चून उभारण्यात येणाऱ्या पूर प्रतिबंधक संरक्षक भिंतीच्या भूमिपूजन सोहळ्यात त्या बोलत होत्या. यावेळी जलसिंचन खात्याचे साहाय्यक अभियंता कमलाकांत माजीक, पर्ये पंचायतीच्या सरपंच रती गावकर, उपसरपंच आत्माराम शेट्टी, दीपा नाईक, दत्ता राणे, हेमंत राणे, अमिषा गावकर, उमेश राणे, लक्ष्मीकांत शिरोडकर उपस्थित होते.

आमदार राणे पुढे म्हणाल्या, की पूर प्रतिबंधक संरक्षण भिंतीची उभारणी करण्यात यावी यासंदर्भाचा प्रस्ताव जलसिंचन खात्याला सादर करण्यात आल्यानंतर जलसिंचन खात्याचे प्रमुख अभियंता प्रमोद बदामी व मंत्री सुभाष शिरोडकर यांनी त्वरित या प्रस्तावाला मान्यता दिली. सुमारे 86 लाख रुपये खर्चून ही संरक्षक भिंत उभारण्यात येणार आहे.

नागरिकांना सहकार्याचे आवाहन

साहाय्यक अभियंता कमलाकांत माजीक यांनी सांगितले, की पावसाळ्यात या भागामध्ये पूरस्थिती निर्माण होत असते. मोठ्या प्रमाणात पाऊस लागल्यानंतर वाळवंटी नदीचे पात्र ओसंडून वाहते. यामुळे या ठिकाणी पूर्ण प्रतिबंधक संरक्षक भिंत उभारण्यात यावी अशी अनेक वर्षांपासूनची मागणी होती.

यासाठी आमदार डॉ. दिव्या राणे यांनी विशेष लक्ष दिल्यामुळे याला मान्यता मिळाली. सुमारे १६० मीटर लांब व अडीच मीटर उंच पूर संरक्षक भिंतींची उभारणी करण्यात येणार आहे. हे काम शक्य तेवढ्या लवकर पूर्ण व्हावे यासाठी विशेष प्रयत्न करण्यात येणार असून नागरिकांनी सहकार्य करण्याची गरज आहे.