पिसुर्ले : प्रतिकूल स्थितीतही भारतरत्न डॉ. बाबासाहेब आंबेडकर यांनी केलेल्या महान मानवतावादी कार्याची माहिती आताच्या तरुण पिढीपर्यंत पोचणे आवश्यक आहे. म्हणूनच भाजपतर्फे आज देशभर या महापुरुषाची जयंती साजरी करण्यात येत आहे. त्यांनी साकारलेल्या संविधानामुळे आज देशात समता प्रस्थापित झाली आहे, याचा लाभ लोकशाही बळकट होण्यासाठी झाला आहे, असे प्रतिपादन पर्येच्या आमदार डॉ. दिव्या राणे यांनी केले. पिसुर्ले येथे आयोजित डॉ बाबासाहेब आंबेडकर जयंती कार्यक्रमात त्या बोलत होत्या.

यावेळी व्यासपीठावर पिसुर्लेचे सरपंच देवानंद परब, होंडा जिल्हा पंचायत सदस्य सगुण वाडकर, पर्ये भाजप संघटक विनोद शिंदे, भिरोंडा पंचायतीचे सरपंच उदयसिंह राणे, दिपाजी राणे, पिसुर्ले पंचायतीचे सर्व पंच सभासद उपस्थित होते.

आमदार दिव्या राणे म्हणाल्या की, डॉ.आंबेडकर यांच्या कार्याचा विसर पडता कामा नये, त्यासाठी त्यांच्या कार्याची माहिती देण्याचे कार्यक्रम आयोजित करण्यात आले पाहिजे, त्यांच्या कडे असलेल्या दुरदृष्टीतून साकारलेल्या संविधान अर्थात घटनेचे आजही पालन केले जाते, ही चांगली बाब आहे.

त्यामुळे आज समाजातील प्रत्येक घटकांनी त्यांच्या कार्याचे अनुकरण केले पाहिजे. त्यासाठी तरूण पिढीने उच्च दर्जाचे शिक्षण प्राप्त करून आपला गाव पुढे नेण्यासाठी प्रयत्न केले पाहिजेत, असेही त्यांनी सांगितले. यावेळी सगुण वाडकर यांनीही मार्गदर्शन केले. सरपंच देवानंद परब यांनी स्वागत केले. अशोक नाईक यांनी आभार मानले.