सासष्टी: दवर्ली-दिकरपाल पंचायत क्षेत्रात अनेक ठिकाणी वेगवेगळ्या कामांसाठी विविध सरकारी खात्यांनी रस्ते खणून ठेवले आहेत. तसेच हे काम मंदगतीने सुरू असल्याने पादचारी तसेच वाहनचालकांना प्रचंड त्रास होत आहे. एकाच वेळी सर्व रस्ते खणून ठेवण्याच्या प्रश्नावर दवर्ली-दिकरपाल ग्रामसभेत गरमागरम चर्चा झाली.

ही कामे पूर्ण का होत नाहीत, असा प्रश्न उपस्थित नागरिकांनी केला. गॅस पाईपलाईन व सिवरेज पाईपलाईन कामांसाठी रस्ते खणलेले आहेत. ही कामे लवकरात लवकर पूर्ण करण्याची मागणी उपस्थितांनी केली.

रविवारच्या ग्रामसभेत पंचायत क्षेत्र स्वच्छ व हरित ठेवण्यावर भर देण्यात यावा, अशी सूचना काही नागरिकांनी केली.

पंचायतराज कायद्यांतर्गत पंचायतीने अद्याप विविध समित्यांचे गठन केलेले नाही. हा मुद्दा सुद्धा चर्चेला आला. शेतीकामासाठी पंचायतीने सहकार्य करावे, अशी मागणी काही शेतकऱ्यांनी केली. त्यांची मागणी पूर्ण केली जाईल, असे यावेळी पंचायतीतर्फे सांगण्यात आले. या ग्रामसभेत २०२५ - २०२६ या काळातील अर्थसंकल्पाला संमती देण्यात आली.

आमदार उल्हास तुयेकर यांना निवेदन सादर

पावसाळा जवळ येऊन ठेपल्याने मे महिन्यापर्यंत रस्त्यांची कामे पूर्ण व्हायला हवीत, असे नागरिकांनी पंचायतीला सांगितले. आम्ही स्थानिक आमदार उल्हास तुयेकर यांच्याशी संपर्क साधला आहे. शिवाय ही कामे लवकरात लवकर पूर्ण करून घ्यावीत, अशा आशयाचे निवेदन आमदारांना दिल्याचे पंचायतीतर्फे सांगण्यात आले.