मुख्यमंत्री डॉ. प्रमोद सावंत (CM Pramod Sawant) यांचा भाऊ, स्वीय सहाय्यक (PA) आहे असे सांगणाऱ्या फसव्या व्यक्ती किंवा फोन कॉलला बळी पडू नका. असे आवाहन गोवा राज्याचे मुख्यमंत्री डॉ. प्रमोद सावंत यांनी राज्यातील जनतेला केले आहे. अशा व्यक्ती किंवा फेक कॉल (Fake Call) विरोधात पोलिसांनी कडक कारवाई करावी अशी सूचना देखील मुख्यमंत्री डॉ. प्रमोद सावंत यांनी पोलिसांनी केली आहे. एका अज्ञात व्यक्तीने मुख्यमंत्र्याचा भाऊ असल्याचे सांगत क्लबमध्ये घुसण्याचा प्रयत्न केल्यानंतर मुख्यमंत्र्यांनी याबाबत जनतेला सतर्क राहण्याचे आवाहन केले आहे.

मुख्यमंत्री डॉ. प्रमोद सावंत म्हणाले, मी संबधित यंत्रणांना अशी फसवणूक करणाऱ्यांबाबत माहिती दिली आहे. तसेच, अशी फसवणूक करणाऱ्यांना पोलिसांनी तात्काळ अटक करावी. राज्यातील जनतेने देखील मुख्यमंत्री प्रमोद सावंत यांचा भाऊ, स्वीय सहाय्यक किंवा विशेष अधिकारी असल्याची बतावणी करणाऱ्या फसव्या व्यक्तीच्या कोणत्याचा आमिषाला बळी पडू नये. असे कोणी सांगत असल्यास मुख्यमंत्री कार्यलयाशी याची एकदा खातरजमा करावी. तसेच, याप्रकरणी मी तक्रार दाखल केली असून, पोलिसांना कडक कारवाई करण्याची सूचना केली आहे.

मुख्यमंत्र्यांचा भाऊ असल्याचे सांगत क्लबमध्ये घुसण्याचा प्रयत्न करणाऱ्या तोतयाला अटक

मुख्यमंत्री प्रमोद सावंत यांचा भाऊ असल्याचे सांगत एल.पी.के क्लबमध्ये घुसण्याचा प्रयत्न करणाऱ्या तोतयाला पोलिसांनी अटक केली आहे. अज्ञात व्यक्तीने प्रमोद सावंत यांचा भाऊ असल्याचे सांगत जबरदस्तीने क्लबमध्ये घुसण्याचा प्रयत्न केला.

मुख्यमंत्र्यांनाही आला होता बोगस फोन कॉल

मुख्यमंत्री डॉ. प्रमोद सावंत (Goa CM Pramod Sawant) यांना देखील आठ दिवसांपूर्वी एक बोगस फोन आला होता. अज्ञात व्यक्तीकडून आलेल्या या फोनवर संबधित व्यक्तीने केंद्रीय कायदा मंत्रालयाकडून बोलत असल्याचा दावा करण्यात आला होता. मुख्यमंत्र्यांनी याप्रकरणी पर्वरी पोलिसांना (Porvorim Police) माहिती दिली. पर्वरी पोलिसांनी अज्ञात व्यक्ती विरोधात गुन्हा दाखल केला असून, याही प्रकरणाचा पोलिस तपास करीत आहेत.