मडगाव : भाजप पक्षात जाण्याची इच्छा व्यक्त केलेले आप पक्षाचे कुडतरी मतदारसंघाचे उमेदवार डॉमनिक गावकर यांची आपने पक्षातून हकालपट्टी केली आहे. आपचे गोव्याचे प्रदेश अध्यक्ष अमित पालेकर यांनी आज बुधवारी हा आदेश जारी केला. गावकर यांनी पक्षविरोधी कृती केल्याने त्यांच्यावर ही कारवाई करण्यात आल्याचे त्यांनी म्हटले आहे

आपचे स्थानिक नेते आणि राय जिल्हा पंचायत सदस्य डॉमनिक गावकर हे आप पक्षाला राम राम करून भाजपात प्रवेश करण्याच्या तयारीत असून येत्या आठवड्यात ते भाजपात प्रवेश करतील असे सांगितले जाते. यासंदर्भात गावकर याना विचारले असता त्यांनी या वृताला दुजोरा दिला. माझी भाजपच्या नेत्यांशी बोलणी झाली असून मी लवकरच त्या पक्षात प्रवेश करणार असे त्यांनी सांगितले.

2022 मध्ये गावकर यांनी आपच्या उमेदवारीवर कुडतरी मतदारसंघातून निवडणूक लढविली होती. आप पक्ष का सोडता असे विचारले असता, मी निवडणुकीला उभा राहिल्यावर आपने मला काही आश्वासने दिली होती. पण ती नंतर पाळली गेली नाहीत. आप तर्फे निवडणूक लढविणे ही माझी चूक होती. माझ्या राजकीय कारकिर्दीवर या निर्णयामुळे बराच वाईट परिणाम झाला असे ते म्हणाले.