Goa Crime News: एका अल्पवयीन मुलीवर बलात्कार करुन तिच्यावर मातृत्व लादल्याच्या आरोपाखाली अटक केलेल्या मोरपिर्ला केपे येथील नीलेश गावकर या तरुणाला बलात्काराच्या आरोपातून निर्दोष मुक्त करण्यात आले आहे.

संबंधित मुलीने जन्म दिलेल्या बाळाशी नीलेश गावकर याचा डीएनए जूळन आला नाही. त्यामुळे नीलेशची दक्षिण गोव्याच्या अतिरीक्त सत्र न्यायाधीश पूजा कवळेकर यांनी निर्दोष मुक्तता केली.

या प्रकरणात संशयिताच्या वतीने ॲड. अमेय प्रभुदेसाई यांनी बाजू मांडताना आपल्या अशिलाला या प्रकरणात विनाकारण गुंतविल्याचा दावा केला. हा दावा न्यायालयाने मान्य केला. या प्रकरणात तीन साक्षीदारांच्या साक्षी सादर करण्यात आल्या.

ही घटना 30 डिसेंबर 2020 या दिवशी घडली होती. कुंकळी पोलीस स्थानकाच्या हद्दीत राहाणाऱ्या एका अल्पवयीन मुलीने एका बाळाला जन्म दिला होता. जन्मानंतर या मुलीने या बाळाला सोडून दिले होते. पोलिसांनी शोध घेत संबंधित मुलीला शोधले.

तिला ताब्यात घेतल्यावर तिने नीलेश गावकर याने मार्च महिन्याच्या दरम्यान तिच्यावर बलात्कार केला होता असे सांगितले. त्यातून आपण गर्भवती राहून या बाळाला जन्म दिल्याचे तिने सांगितले होते.

त्यानंतर या प्रकरणी गुन्हा नोंद झाला होता. पोलीसांनी नीलेश याला अटक केली होती. नीलेशने तो निर्दोष असल्याचे सांगितले होते. अखेर नीलेश आणि जन्मजात बाळाची डीएनए टेस्ट करून दोघांमध्ये काही नाते आहे का हे पडताळणी करून पाहायचे ठरले.

त्यानंतर दोघांचेही नमुने घेत डीएनए चाचणी केली असता ती जुळून आली नाही. त्यामुळे नीलेशचा बाळाशी संबंध नसल्याचे स्पष्ट झाले. अभियोग पक्ष संशयितावरील आरोप कुठल्याही प्रकारे सिद्ध करू शकला नाही, असे नमूद करीत त्याला निर्दोष मुक्त केले.