पणजी: दीपावली आता अवघ्या दोन दिवसांवर येऊन ठेपली आहे. बाजारात खरेदीची लगबग वाढली असून गर्दी वाढली आहे.

विविध प्रकारचे मिठाईचे साहित्य, फराळासाठी लागणारे साहित्य, आकाशकंदील, पणत्या, फटाके आदी खरेदीला चांगला प्रतिसाद लाभत आहे. दिवाळीनिमित्त लागणारे कारीट बाजारात भाव खाऊ लागले असून २० रुपयांना अर्धा डझन दराने त्याची विक्री होऊ लागली आहे.

पूर्वी सर्रासपणे सर्वत्र मिळणारी ही कारीट आता शहरी भागात मिळणे कठीण झाल्याने शहरात राहणाऱ्या नागरिकांना ती विकत घेण्यावाचून पर्याय राहिलेला नाही. काहीजण कामाच्या व्यस्ततेमुळे ती विकत घेणेच पसंत करतात. पणजीतील फलोत्पादन महामंडळाच्या गाळ्यावर देखील कारीट विकली जात आहे.

बाजारात विविध प्रकारच्या मिठाईसोबतच गावठी पोहे, भुईमुगाच्या शेंगा, रताळी, काटेकणगा आदींनादेखील चांगली मागणी आहे. काटेकणगा १५० रुपये किलो वाटा, रताळी ६० रुपये किलो तर भुईमूग १०० रुपये किलो दराने विकले जात आहेत. फळभाज्यांचे दर मागील आठवड्याप्रमाणेच कायम आहेत.