Gomantak Bhandari Samaj

पणजी: राज्यातील इतर मागासवर्गीयांतील सर्वांत मोठा भंडारी समाज आता फुटीच्या उंबरठ्यावर पोचला आहे. सध्या या समाजाची गोमंतक भंडारी समाज ही एकमेव संघटना असून तिला समांतर अशी दुसरी संघटना स्थापन कऱण्याच्या हालचाली सुरू झाल्या आहेत. येत्या आठवड्यात त्याविषयीची घोषणा केली जाऊ शकते, अशी माहिती मिळाली आहे. दुसरीकडे गोमंतक भंडारी समाज संघटनेचे अध्यक्ष अशोक नाईक यांनी ६ ऑक्टोबर रोजी वास्को येथे समाजाची आमसभा बोलावली आहे.

समाजाच्या अध्यक्षपदी अनिल होबळे असताना त्यांच्या पॅनलविरोधात अशोक यांच्या पॅनेलने निवडणूक लढविली. त्यात होबळे यांच्या गटाचे उपेंद्र गावकर हे एकमेव उमेदवार निवडून आले. सभासदांपेक्षा मतदान जास्त कसे झाले, या मुद्यावर होबळे यांनी निवडणुकीस आक्षेप घेतला. ते नंतर न्यायालयातही गेले आहेत.

अशोक यांच्या गटाकडे होबळे यांनी ताबा न देताच त्यांनी कारभार सुरू केल्याने विरोधकांकडून ती समिती बेकायदा असल्याचा वारंवार पुनरुच्चार करण्यात येत आहे. संघटनेच्या पदाधिकाऱ्यांनी गेल्या वर्षी ऑगस्टमध्ये ऑनलाईन पद्धतीने घेतलेल्या मुदतवाढीसही आक्षेप आहे.

नाईकांच्या वाढदिनी काय नाट्य घडले?

मंत्री रवी नाईक यांच्या वाढदिनी अशोक हे समितीच्या पाच सदस्यांसह त्यांना शुभेच्छा देण्यासाठी गेले होते.

त्यावेळी राजकीय आरक्षण ओबीसींना का नाही, हा मुद्दा चर्चेत आला. त्यावेळी नाईक यांनी, मला मंत्रालयात भेटायला या, असा निरोप दिला.

त्‍यानुसार महादेव नाईक, दिलीप परूळेकर, दयानंद मांद्रेकर यांच्यासह किरण कांदोळकर, जयेश साळगावकर, नरहरी हळदणकर, लवू मामलेदार, उल्हास अस्नोडकर रवी नाईक यांच्याकडे पोचले, तेव्हा अशोक नाईक समितीसह तेथे आले.

तेथे संजीव नाईक आणि इतरांमध्ये शाब्दिक चकमकही झाली. प्रकरण एवढे वाढले की, रवी नाईक यांनी आपल्यासोबत छायाचित्रही नको, अशी भूमिका घेतली.

अखेर माजी मंत्री मांद्रेकर यांच्या हस्ते निवेदन देऊन विषय मिटविण्यात आला.