आगोंद: राज्यातील देवस्थान समितीच्या निवडीबाबत प्रशासन श्रीस्थळ येथील श्री मल्लिकार्जुन देवस्थानासंदर्भात दुजाभाव करत आहे,असा आरोप देवस्थान समितीचे अध्यक्ष राजेंद्र देसाई यांनी केला आहे. संबंधितांनी या संबंधी खुलासा करावा,अशी मागणीही त्यांनी केली.

राज्य प्रशासनातर्फे राज्यातील देवस्थान समितीची दि. 13 मार्च रोजी होऊ घातलेली देवस्थान समितीची निवडणूक काणकोण महालात अवतार पुरुषाच्या उत्सवामुळे महाजनांना अडचणीची ठरणार असल्यामुळे दि.23 मार्च नंतर किंवा 8 मार्चपूर्वी घ्यावी, असे निवेदन देवस्थान समितीने देवस्थानचे प्रशासक तथा कोणकोणच्या मामलेदारांना सादर केले होते. यासंबंधीचा निर्णय अजून देवस्थान समितीला प्राप्त झालेला नाही.

श्री मल्लिकार्जुन देवस्थान श्रीस्थळ, काणकोण देवस्थानशी संलग्न श्री देव अवतार पुरुष देवाचा वार्षिक देवविधी, अवतार, उत्सव व जत्रोत्सव 9 ते 23 मार्च पर्यंत विविध धार्मिक कार्यक्रमांनीशी साजरा होणार आहे. या उत्सवातदेवस्थानच्या सर्व महाजनांचा प्रत्यक्ष सहभाग अपेक्षित असतो. या कारणास्तव दि. 13 मार्च रोजी, नियोजित देवस्थान समितीच्या निवडणुकीत भाग घेणे महाजनांना अडचणीचे होणार असल्याचे महाजनांनी देवस्थान समितीला कळवले होते.कवळे फोंडा येथील देवस्थानला त्यांच्या अडचणींमुळे दि.20 मार्च रोजी समिती निवडणूक घेण्यास मुभा असेल तर काणकोण, श्रीस्थळ देवस्थानही तडजोड करून दि. 20 रोजी निवडणूक घेण्यास तयार आहे. मात्र 13 मार्च ही तारीख सोयीची नाही,असे देवस्थानचे सचिव अमर शाबा देसाई यांनी सांगितले.