Sanjay School Porvorim: पर्वरी येथील दिव्यांगांसाठी असलेल्या जुन्या संजय स्कूल इमारतीच्या दुसऱ्या मजल्यावरून सिडनी डिसोझा हा दिव्यांग तरुण पडून गंभीर जखमी झाला. त्याला गोमेकॉ इस्पितळात दाखल करण्यात आले आहे. तो बेशुद्धावस्थेत असून त्याची प्रकृती गंभीर आहे. याप्रकरणी पर्वरी पोलिसांनी अपघाती गुन्हा नोंदवला आहे.

ही घटना आज (बुधवारी) सकाळी १० वाजता घडली. या घटनेमुळे या इमारतीमध्ये दिव्यांगांच्या सुरक्षिततेचा प्रश्न निर्माण झाला आहे. दिव्यांगांच्या पालकांनी या घटनेची माहिती मुख्यमंत्री डॉ. प्रमोद सावंत यांना दिली असली तरी त्यांच्याकडून काहीच प्रतिसाद मिळाला नसल्याचे सांगण्यात आले.

पर्वरी पोलिसांनी दिलेल्या माहितीनुसार, संजय स्कूलमध्ये शिकणारा हळदोणे येथील दिव्यांग सिडनी डिसोझा (वय ४० वर्षे) हा आपल्या आईसोबत पर्वरी येथील जुन्या संजय स्कूल इमारतीत असलेल्या आधार कार्ड सेवा केंद्रात स्वत:चे कार्ड बनवण्यासाठी गेला होता.

तेथे तो दुसऱ्या मजल्यावरील व्हरांड्यात असलेल्या लोखंडी रेलींग्सला टेकून उभा होता. त्यावेळी हे रेलींग मोडल्याने त्याचा तोल जाऊन खाली पडला. त्यामुळे त्याच्या कंबरेच्या हाडाला तसेच डोक्याला गंभीर दुखापत झाली. त्याला लगेच गोमेकॉ इस्पितळात दाखल करण्यात आले. त्याच्यावर उपचार करण्यात येत असून अजूनही तो शुद्धीवर आला नसल्याची माहिती सूत्रांनी दिली.

मुख्यमंत्र्यांकडून दखल नाहीच

या घटनेनंतर संजय स्कूलमधील दिव्यांग मुलांच्या पालकांनी मुख्यमंत्री डॉ. प्रमोद सावंत यांची भेट घेऊन या जुन्या असुरक्षित संजय स्कूल इमारतीबाबत तसेच घडलेल्या घटनेची माहितीही दिली. मात्र, त्यांनी तत्परतेने काहीच हालचाल न केल्याचा दावा करत काही पालकांनी संताप व्यक्त केला आहे.