Digitization of Books At Krishnadas Shama State Central Library

पणजी: गोव्यात वाचन संस्कृती वृद्धिंगत व्हावी. जुन्या दुर्मिळ पुस्तकांचे संवर्धन व्हावे, जुना ज्ञानाचा खजिना अबाधित रहावा, जुन्या वृत्तपत्रांचेही डिजिटल स्वरूपात सुरक्षित रहावीत यासाठी कृष्णदास शामा केंद्रीय वाचनालयातील दस्ताऐवजांच्या डिजिटलायजेशनचे काम सुरू असून आतापर्यंत सुमारे ८ लाख पानांचे डिजिटालयजेशनचे काम पूर्ण झाल्याची माहिती संबंधित अधिकाऱ्यांनी दिली.

सदर काम दोन मोठ्या स्कॅनरद्वारे करण्यात येत असून येत्या काही दिवसांत डिजिटलायजेशनसाठी आणखी एका स्कॅनर आणला जाणार आहे. केंद्र सरकारने करण्यात आलेल्या आर्थिक मदतीतून माहिती आणि तंत्रज्ञान महामंडळातंर्गत या डिजिटलायजेशनचे काम सुरू आहे. मागील सहा महिन्यांपासून हे काम सुरू असून पुढेही सुरू राहणार आहे. आतापर्यंत सुमारे १० टक्के डिजिटलायजेशनचे काम पूर्ण झाले असून हे काम युद्धपातळीवर सुरू आहे.

पोर्तुगीजपूर्वकालीन पुस्तकांचे जतन

कृष्णदास शामा केंद्रीय वाचनालयात पोर्तुगीजकालीन तसेच पोर्तुगीजपूर्व काळातील सुमारे ४० हजार दुर्मिळ पुस्तके आहेत. डिजिटालयजेशनद्वारे त्यांचे संवर्धन करत हा खजिना येणाऱ्या पिढ्यांसाठी डिजिटल स्वरूपात अबाधित राखण्यासाठी सरकार प्रयत्नरत आहे. त्यासोबतच गोव्यात पोर्तुगीज काळात प्रसिद्ध होणारी वृत्तपत्रे, मुक्तीनंतरची वृत्तपत्रे जी गोव्याचा सामाजिक, राजकीय इतिहास कथन करतात त्यांचेही डिजिटलायजेशन करण्यास प्राधान्य देण्यात येत आहे.

केंद्राकडून ७४ कोटींचा निधी

केंद्र सरकारकडून वाचनालयांचा विकास करण्यासाठी सुमारे ७४ कोटी रूपये देण्यात आले असून या निधीच्या माध्यमातून वाचनालयांचे अद्ययावतीकरण, नवीन वाचनालये, दुर्मिळ पुस्तकांचे डिजिटलायजेशनन, डिजिटल वाचनालय, हरित वाचनालय आदी उपक्रम राबविण्यात येत आहेत.