सासष्टी: डॉ. फ्रान्सिस लुईस गोम्स हे थोर विचारवंत, देशभक्त, आर्थशास्त्रज्ञ, सर्जन होते, त्या काळात पोर्तुगालच्या संसदेत जाऊन भारतीय स्वातंत्र्याचा नारा देण्याचे धाडस त्यांनी दाखवले होते. तरुण , विद्यार्थ्यांनी डॉ. फ्रान्सिस लुईस गोम्स यांचा आदर्श घेऊन पुढे जावे, असे प्रतिपादन सार्वजनिक बांधकाम मंत्री दिगंबर कामत यांनी केले.

डॉ. फ्रान्सिस लुईस गोम्स यांच्या १५६व्या पुण्यतिथी दिनाचे औचित्य साधून सरकारी पातळीवर मडगावात कोमुनिदाद इमारतीजवळील त्यांच्या पुतळ्याला तसेच नावेली येथील त्यांच्या स्मारकाला आदरांजली वाहण्यासाठी आयोजित कार्यक्रमात ते बोलत होते. डॉ. फ्रान्सिस लुईस गोम्स यांनी राष्ट्र प्रथम हे तत्व आचरणात आणले. आताच्या काळात नैतिक मूल्ये जपण्याची गरज आहे, असे त्यांनी सांगितले.

डॉ. फ्रान्सिस लुईस गोम्स ट्रस्टचे संस्थापक व अध्यक्ष लुईझिन फालेरो यांनी सर्वांचे स्वागत केले. दोनच वर्षांनी त्यांची दुसरे शताब्दी वर्ष साजरे केले जाणार आहे, असे त्यांनी सांगितले. डॉ. फ्रान्सिस लाईस गोम्स यांची जयंती व पुण्यतिथी राज्य पातळीवर करण्याचा सरकारचा निर्णय स्त्युत्त असून त्याचे आपण स्वागत करतो असे फालेरो यांनी सांगितले. हा कार्यक्रम यशस्वी करण्यात जिल्हा प्रशासनाने केलेली तयार प्रशंसनीय असल्याचेही त्यांनी सांगितले.

नावेलीच्या रोझरी चर्चचे धर्मगुरु फा. गाब्रिएल कुतिन्हो यांनी सांगितले, की डॉ. फ्रान्सिस लुईस गोम्स हे नावेलीचे. शैक्षणिक क्षेत्रात त्यांचा वारसा पुढे नेणे ही त्यांना खऱ्या अर्थाने श्रद्धांजली ठरेल. नावेलीत आमदार उल्हास तुयेकर, माजी आमदार आवेर्तान फुर्तादो, जिल्हा पंचायत सदस्य एडविन कार्दोज, सरपंच पॉल पेरेरा, दक्षिण गोव्याच्या जिल्हाधिकारी एगना क्लिटस, पोलिस अधीक्षक तिकम सिंग वर्मा, स्वातंत्र्य सैनिक संघटनेचे अध्यक्ष रोहिदास देसाई, अविनाश शिरोडकर, विनायक मोर्डेकर उपस्थित होते.

मडगाव येथील कोमुनिदाद इमारती जवळील कार्यक्रम १८ जून क्रांतीदिन समितीने जिल्हा प्रशासनाच्या सहकार्याने आयोजित केला होता. या प्रसंगी साबांखा मंत्री दिगंबर कामत, नगराध्यक्ष दामोदर शिरोडकर, उपनगराध्यक्ष बबिता नाईक, नगरसेवक महेश आमोणकर, दामोदर वरक, उपजिल्हाधिकारी गणेश बर्वे, वाहतूक पोलिस उपअधिक्षत राजेंद्र प्रभुदेसाई, अविनाश शिरोडकर, विनायक मोर्डेकर हे मान्यवर उपस्थित होते.