Bicholim Market: आगीसारख्या घटनेवेळी आपत्कालीन मदतकार्य म्हणून येथील बाजारात नव्याने ''फायर हायड्रण्ट''ची व्यवस्था करण्यात येणार आहे. तसेच अतिक्रमणाविरोधात कारवाई करण्यात येणार आहे, अशी माहिती नगराध्यक्ष कुंदन फळारी यांनी दिली आहे.

गुरुवारी रात्री बाजारात भीषण आगीची घटना घडल्याच्या पार्श्वभूमीवर पालिकेला आता खडबडून जाग आली आहे. काही वर्षांपूर्वी शहरात ''फायर हायड्रण्ट''ची व्यवस्था करण्यात आली होती, मात्र आता ती कुचकामी ठरली आहे.

आमदारांकडून सूचना : ‘फायर हायड्रण्ट'संबंधी आमदार डॉ. चंद्रकांत शेट्ये यांनी पालिकेला सूचना केली आहे. लवकरच पालिका मंडळाची बैठक घेऊन तसा ठराव घेण्यात येईल.

बाजारातील अतिक्रमणे हटविली नाहीत तर कारवाई अटळ आहे. पालिका कोणाही दुकानदारांच्या विरोधात नाही, बाजारपेठ सुरक्षित राहावी, हा उद्देश आहे, असे नगराध्यक्ष कुंदन फळारी यांनी सांगितले.

बाजारात अडथळा

गुरुवारी रात्री बाजारात आगीची घटना घडली, त्यावेळी अग्निशमन दलाचा बंब घटनास्थळी नेण्यास अडथळा निर्माण झाला. अतिक्रमण आणि ऊन-पावसापासून बचाव व्हावा म्हणून बहुतेक दुकानदारांनी प्लॅस्टिकची आच्छादने घातली आहेत. या अडथळ्यामुळे बंब बाजारात नेणे शक्य झाले नाही. परिणामी मुख्य रस्त्यावर बंब उभे करून मदतकार्य करावे लागले. याची पालिकेने गंभीर दखल घेतली आहे.