I-League Football Tournament: कपिल होबळे याने नोंदवलेल्या दोन गोलच्या बळावर धेंपो स्पोर्टस क्लबने केंकरे एफसीवर 4-0 एकतर्फी फरकाने मात करून आय-लीग 2 फुटबॉल स्पर्धेत दुसऱ्या क्रमांकावर झेप घेतली. सामना सोमवारी मुंबईजवळील खारगर येथे झाला.

दरम्यान, कपिलने अनुक्रमे 12व्या व 81व्या मिनिटास गोल केला. याशिवाय नेसियो फर्नांडिसने 33व्या, तर डेस्मन परेराने 90+5व्या मिनिटास प्रत्येकी एक गोल करून धेंपो क्लबच्या मोठ्या विजयाची औपचारिकता पूर्ण केली. सामन्याच्या 80व्या मिनिटास केंकरे एफसीचा एक खेळाडू कमी झाला. त्यांच्या पवन व्यंकटरत्नम याला रेफरीने अखिलाडूवृत्तीबद्दल रेड कार्ड दाखविले.

दुसरीकडे, समीर नाईक यांच्या मार्गदर्शनाखालील धेंपो क्लबचा हा 12 लढतीतील सहावा विजय ठरला. त्यामुळे त्यांचे 21 गुण झाले व दुसरा क्रमांक मिळाला. त्यांनी आता प्रत्येकी 20 गुण असलेल्या एफसी बंगळुरु युनायटेड व सुदेवा दिल्ली एफसीवर एका गुणाची आघाडी घेतली आहे. केंकरे एफसीला नववा पराभव पत्करावा लागला. त्यामुळे 12 लढतीनंतर त्यांचे नऊ गुण आणि शेवटचा आठवा क्रमांक कायम राहिला. धेंपो क्लबचा पुढील सामना 21 एप्रिल रोजी वास्को येथील टिळक मैदानावर पारंपरिक प्रतिस्पर्धी स्पोर्टिंग क्लब द गोवा संघाविरुद्ध होईल.

स्पोर्टिंग बंगळुरुचे अग्रस्थान भक्कम

नवी दिल्ली येथील आंबेडकर स्टेडियमवर सोमवारी आणखी एका सामन्यात स्पोर्टिंग क्लब बंगळूरने सुदेवा दिल्ली एफसीला 1-0 फरकाने निसटते हरविले. यामुळे बंगळूरुच्या संघाचे अग्रस्थान भक्कम झाले. त्यांचा हा 12 लढतीतील नववा विजय ठरला. त्यांचे आता सर्वाधिक 27 गुण झाले आहेत. दुसऱ्या क्रमांकावरील धेंपो क्लबच्या तुलनेत त्यांचे सहा गुण जास्त आहेत. सुदेवा दिल्ली संघाला पराभवामुळे धक्का बसला. त्यांचा हा 12 लढतीतील चौथा पराभव ठरला. त्यामुळे ते 20 गुणांसह ते चौथ्या स्थानी घसरले.