Dhavalim-Ponda Road Closed: काल (5 मे) फोंडा ढवळी इथल्या भंगारअड्ड्याला भीषण आग लागली होती. अचानक लागलेल्या आगीमुळे परिसरातील नागरिकांमध्ये भीतीचे वातावरण निर्माण झाले होते. ही आग इतकी भीषण होती की, आग विझवण्यासाठी एकूण 28 टँकर्स वापरण्यात आले होते. काल जरी आग विझली असली तरीदेखील अजूनही ती आग धुमसत असल्याने खबरदारीचा उपाय म्हणून ढवळी-फोंडा मार्ग वाहतुकीसाठी बंद करण्यात आला आहे.

काल आगीवर नियंत्रण मिळाले असले तरी भंगारअड्ड्यात आतमध्ये अजूनही आग धुमसतच आहे. त्यामुळे बॅरिकेड्स टाकून हा रस्ता वाहतुकीसाठी बंद करण्यात आला आहे. घटनास्थळी उपस्थित असलेल्या पोलीस अधिकाऱ्यांनी दिलेल्या माहितीनुसार, जोपर्यंत ही आग संपूर्णपणे विझत नाही तोपर्यंत हा मार्ग बंद ठेवण्यात येणार आहे.

फोंड्यात जाण्यासाठी हा मुख्य मार्ग असल्याने वाहनचालकांना मात्र नाहक त्रास सहन करावा लागत आहे. माहितीनुसार, या रस्त्यावरील वाहतूक बेतोडा जंक्शनकडून वळवण्यात आली आहे. त्यामुळे दुचाकीचालकांना साधारण 3 किलोमीटर तर चारचाकी आणि मोठ्या वाहनचालकांना 6 किलोमीटर ज्यादाचे अंतर पार करावे लागत आहे.

जर आज संध्याकाळपर्यंत परिस्थिती नियंत्रणात आली तर मार्ग पुन्हा वाहतुकीसाठी खुला होण्याची शक्यता असल्याचा अंदाज घटनास्थळी असलेल्या एका अधिकाऱ्याने व्यक्त केला. मात्र अद्याप याबाबत कोणतीही ठोस माहिती नसल्याचे त्यांनी सांगितले.

व्हिडिओ पाहण्यासाठी खालील लिंकवर क्लिक करा:

दरम्यान, तिथे असलेले भंगारअड्डे हे अवैध असून परिसरातील नागरिकांच्या जीवाला यामुळे हानी पोहोचत असल्याचे मत राहिवाश्यांनी व्यक्त केले. काल आग लागल्यानंतर वीजमंत्री ढवळीकर यांनी घटनास्थळी भेट देऊन परिस्थितीची पाहणी केली. यावेळी त्यांनी येत्या 15 दिवसांत हे अड्डे हटवण्यासाठी उपजिल्हाधिकाऱ्यांना सूचना केली आहे.