दाबोळी: गणेश चतुर्थीला काहीच दिवस शिल्लक आहे. लोकांनी आपली तयारी सुरू केली आहे. लोकांनी आपला गणरायाच्या मुर्त्या आगाऊ नोंदणी करुन ठेवल्या आहेत. दरम्यान भाविकांनी बाप्पाच्या आगमनाची तयारी सुरू केली असून गेल्या वर्षी कोरोनामुळे या उत्सवावर विरजण पडले होते. त्यानुसार दीड दिवसांचा गणेश उत्सव (Ganesh Utsav) साजरा करण्यात आला होता.

दरम्यान यंदा सरकारची नियमावली काहीही असो भक्तांनी मात्र तयारी सुरू केलेली आहे. अनेकांनी बाजारातून कागद,माळा, थर्माकोल घेऊन सजावट करण्यास सुरुवात केली आहे. झुवारीनगर येथे एका फॅक्टरीत वेगवेगळ्या डिझाईनच्या थर्माकोल कटिंग करण्यात आले आहेत. युवक थर्माकोल सजावटीचे सामान आणून कामाला लागले आहेत.

दरम्यान कालचा रविवार युवा वर्गाचा सजावटीसाठी राहिला. जास्तीत जास्त सजावटीचे काम उरकून काढण्यात युवकांनी प्राधान्य दिले. तसेच यात लहान मुलांचाही सहभाग दिसला. यात पुढील दोन-तीन दिवस कसरतीचे असणार आहे. मात्र यंदाचा गणेशोत्सव आपण कोणत्याही परिस्थितीत धडाक्यात साजरा करणारा याच दृष्टीने प्रत्येक जण कामाला लागला आहे. तशी तयारी आपल्या लाडक्या गणरायाच्या आगमनासाठीची ठेवली आहे.