Indian Super League Football Tournament: आय-लीग फुटबॉल स्पर्धेसाठी पात्रतेचा दावा कायम राखताना माजी विजेत्या धेंपो स्पोर्टस क्लबने बुधवारी आय-लीग 2 फुटबॉल स्पर्धेत महत्त्वपूर्ण विजयाची नोंद केली. त्यांनी बलाढ्य एफसी बंगळूर युनायटेडला 2-1 फरकाने नमवले. हा सामना बंगळूरु येथे झाला.

दरम्यान, सामन्याच्या पूर्वार्धात अर्ध्या तासात दोन गोल केल्यानंतर धेंपो क्लबने विजयाचे पूर्ण तीन गुण प्राप्त केले. नेसियो फर्नांडिस याने 18 व्या मिनिटास माजी आय-लीग विजेत्यांचे गोलखाते उघडले. नंतर 31व्या मिनिटास राहुलकुमार पासवान याने गोव्याच्या संघाची आघाडी 2-0 अशी भक्कम केली. 59 व्या मिनिटास ऋषभ डोब्रियाल याने बंगळूरु युनायटेडची पिछाडी एका गोलने कमी केली.

दुसरीकडे, या विजयासह समीर नाईक यांच्या मार्गदर्शनाखालील धेंपो क्लबने स्पर्धेत सलग पाच सामने अपराजित राहण्याचा पराक्रम साधला. यामध्ये चार विजय आणि एका बरोबरीचा समावेश आहे. धेंपो क्लबचा पुढचा सामना बंगळूरु येथेच स्पोर्टिंग क्लब बंगळूरुविरुद्ध सहा एप्रिल रोजी होईल. स्पर्धेत बुधवारी आणखी दोन सामने झाले. दिल्ली येथे सुदेवा दिल्ली एफसीने युनायटेड स्पोर्टस क्लबला 1-0 असे नमवले, तर स्पोर्टिंग क्लब बंगळूरुने ऑरेंज एफसीवर 2-0 असा विजय नोंदवून अग्रस्थान मिळवले.