काणकोण: मराठी राजभाषा निर्धार समितीच्या एका शिष्टमंडळाने , राज्य निमंत्रक प्राचार्य सुभाष भास्कर वेलिंगकर व प्रमुख मार्गदर्शक गो. रा. ढवळीकर यांच्या नेतृत्वात क्रीडामंत्री रमेश तवडकर यांची भेट घेऊन, कोकणीबरोबरच मराठी राजभाषा करावी, या मागणीचे निवेदन त्यांना सुपूर्द केले.

शिष्टमंडळात केंद्रीय मार्गदर्शक समितीचे गोविंद देव, कोषाध्यक्ष सूर्यकांत गावस, माजी महापौर अशोक नाईक, राज्य मातृशक्तीप्रमुख डाॅ. अनीता तिळवे, कार्यालय प्रमुख सुरेश डिचोलकर, शाणुदास सावंत व हरिश्चंद्र नाईक होते.

१९87 मध्ये ऐनवेळी ‘व्हीप’ बजावून काँग्रेस आमदारांना, सरकारला हवे तसे मतदान करण्यास भाग पाडण्यात आले व आजचा, मराठीला दुय्यम लेखणारा कायदा संमत झाला, ही पार्श्वभूमी सांगण्यात आली. आपण सहकाऱ्यांशी याबाबत चर्चा करू, असे मंत्री रमेश तवडकर यांनी सांगितले.

विविध क्षेत्रांत मराठीचा वापर

शिकणाऱ्या विद्यार्थ्यांची संख्या, मराठी-समर्थन-ठराव करणाऱ्या ग्रामपंचायती,नगरपालिका, ब्लाॅक्सची संख्या, सर्व वृत्तपत्रे, बहुसंख्य जनतेच्या पत्रलेखनाची भाषा मराठी, संस्था, मंदिरे, सहकारी संस्था तसेच सरकारी दफ्तर यातील केवळ मराठीचा वापर वगैरे गोष्टी मंत्री रमेश तवडकर यांच्या लक्षात सरकारी आकडेवारीसह आणून देण्यात आल्या.