Mandrem News : मोरजी, ता. एका बाजूने मांद्रे मतदारसंघात आणि पर्यायाने पूर्ण पेडणे तालुक्यातील जमीन रूपांतर आराखडा रद्द करावा, यासाठी आंदोलन सुरू आहे. तर काही ठिकाणी आजही बेकायदेशीर डोंगर कापणी करून पर्यावरणाची हानी पोचविण्याचे काम सुरू आहे.

अशीच एक डोंगर कापणी मांद्रे पंचायत क्षेत्रातील सच्चे भाटले मांद्रे या माळरानावर सुरू आहे.या डोंगर माळरानावर पूर्णपणे काजूची बागायत आहे. ही जमीनसुद्धा रूपांतरित करून आराखड्यात समाविष्ट केलेली आहे.

स्थानिकांकडून जमिनी घेऊन बिगर गोमंतकीयांनी विकत घेतलेल्या आहे. या ठिकाणी मोठमोठे प्रकल्प उभारण्याचे काम सुरू केले आहे.

या संदर्भात मांद्रे पंचायतीकडे लेखी स्वरूपात तक्रार आल्यानंतर सरपंच अमित सावंत, पंच प्रशांत नाईक यांनी घटनास्थळी जाऊन पंचनामा केला.

सच्चे भाटले मांद्रे या ठिकाणी बेकायदेशीर डोंगर मोठ्या प्रमाणात कापला जात आहे. याविषयी नुकतीच जी मांद्रे या ठिकाणी सभा झाली होती.

त्या सभेमध्ये पंच सदस्य बाळा ऊर्फ प्रशांत नाईक म्हणाले, जमीन रूपांतर आराखड्याचा एक नमुना म्हणून सच्चे भाटले येथील जी काजू बागायतीची जमीन आहे, माळरान आहे.

टीसीपी खात्याने याची चौकशी करून संबंधितावर कडक कारवाई करावी, अशी मागणी केली.

बांधकामाला विरोधच!

हा परिसर केवळ बाग काजू बागायतीने नटलेला निसर्ग संपन्न असा परिसर आहे. वादग्रस्त जमीन रूपांतर आराखडा तयार केलेला आहे.

माळरान व येथील जमीन ‘नो डेव्हलपमेंट झोन’ म्हणून गणली जाते. या जमिनीमध्ये कोणत्याही प्रकारचे बांधकाम करू देणार नाही, असा इशारा पंच बाळा ऊर्फ प्रशांत नाईक यांनी दिला.