मडगाव (Margao) : अभियंत्यांच्या नोकरीसाठी सार्वजनिक बांधकाम मंत्री दीपक पाऊसकर (deepak pawaskar) 25 लाख रुपये घेत असल्याची तक्रार भाजपचे पणजीचे आमदार बाबुश मोन्सरात यांनी केल्यानंतर गोवा फॉरवर्डचे अध्यक्ष विजय सरदेसाई (Vijay Sardesai) यांनी सरकारवर टीका करताना हे सरकार मेन्यू कार्ड सरकार हा जो आम्ही आरोप करत होतो त्याला सत्ताधारी आमदारानेच दुजोरा देत असा दावा केला आहे.

विजय सरदेसाई यांनी बाबुशनी केलेल्या आरोपानंतर ट्विट करताना, ह्या भ्रष्टाचारकांडाची आम्ही केंद्रीय निवडणूक आयोगाकडे (Election Commission) तक्रार करूच त्याशिवाय उच्च न्यायालयातही याचिका दाखल करू असे म्हटले आहे.

दुसऱ्या बाजूने गोवा फॉरवर्डचे उपाध्यक्ष दुर्गादास कामत यांनी थेट प्रधानमंत्री नरेंद्र मोदी यांनाच ट्विट करताना 'न खायेंगे, न खाने देंगे', याचे काय झाले प्रधानमंत्रीजी असा सवाल केला आहे. बाबुश मोन्सरात यांच्या आरोपाने सध्या गोव्याच्या राजकारणात खळबळ माजविली असून सगळीकडून सरकार टीकेचे लक्ष होत आहे. विजय सरदेसाई यांनी यासंदर्भात सरकारवर टीका करताना गोवेकारांना लुटणारे हे सरकार असा आरोप केला आहे. ह्या सरकारने गोव्याची इज्जत वेशीवर टांगली असा आरोप त्यांनी केला.

गोवा फॉरवर्डच्या तक्रारीचा मसुदा तयार करणे चालू असून सोमवारपर्यंत आम्ही ही तक्रार दाखल करू अशी माहिती दुर्गादास कामत यांनी दिली.