Vasco News : मुख्यमंत्री देवदर्शन योजनेखाली तिरुपतीला गेलेल्या एका महिलेचे निधन झाल्याची घटना घडली आहे. मृत महिला वास्को येथील असून गुरुवारी रात्री उशीरा ही बातमी गोव्यात येऊन धडकली आणि एकच गोंधळ उडाला.

मंगळवारी 900 भाविक वास्कोहून तिरुपतीला रवाना झाले होते. या 900 भाविकांच्या तुकडीला मुरगावचे आमदार संकल्प आमोणकर यांनी शुभेच्छा देवून रवाना केले होते. तिरुपतीला गेलेल्या या तुकडीतील एका महिलेचे निधन झाले आहे.

मुख्यमंत्री देवदर्शन योजनेखाली तिरुपतीला गेलेल्या वास्को येथील कल्याणी काणकोणकर या 75 वर्षीय महिलेचे यात्रा स्थळीच गुरुवारी संध्याकाळी निधन झाले. बालाजी दर्शनासाठी गोव्यातील भाविक पद्मावती देवळात गेले आताना ही घटना घडली.

कल्याणी काणकोणकर ही महिला अचानक देवळात कोसळली. यावेळी इतरांनी तिला तातडीने रुग्णालयात दाखल केले. पण तिथे तिला डॉक्टरांनी मृत जाहीर केले. या घटनेची माहिती गोव्यात गुरुवारी रात्री उशीरा येऊन धडकली आणि एकच गोंधळ उडाला.